Hearrá loahpaha iežas álbmoga vuolideami
1 Hearrá, don leat mu Ipmil,
mun rámidan du ja máinnun du nama.
Don leat ollašuhttán
ovddolaš áigumušaidat,
du lohpádusat dološ áiggi rájes
leat nannosat.
2 Don rievdadit gávpoga geađgeguhpan,
nana ladni čievračopman.
Vierrásiid ladnit leat duššaduvvon,
eai dat huksejuvvo šat goassege.
3 Danne fámolaš álbmogat
gudnejahttet du,
goaves báhkiniid gávpogat ballet dus.
4 Don šaddet vártnuhemiid suodjin,
váivvášiid dorvun sin heađis,
suodjin ráššoarvvis, suoivvanin báhkas.
Veahkaválddálačča suhttu
lea dego ráššoarvi
5 ja nugo báhkka čázehis eatnamis.
Don jaskkodahttet vierrásiid rieja.
Nugo báhkka balvva suoivanis,
nu jávohuvvá veahkaválddálaččaid lávlun.
6 Hearrá, Almmiveagaid Ipmil,
ráhkada dán várrái
guossemállásiid buot álbmogiidda,
guossemállásiid main leat
buoiddes borramušat ja boares viidni,
buoiddes, ađđás borramušat
ja boares, čielgaduvvon viidni.
7 Dán váris son duššada
suoggama mii gokčá buot álbmogiid,
dan gokčasa mii lea buot
olbmuid čearddaid badjel.
8 Son duššada jápmima agálaččat.
Hearrá Ipmil sihkku gatnjaliid
buohkaid ámadajus
ja jávkada iežas álbmoga vuolideami
ja heahpada miehtá eatnama.
Hearrá lea sárdnon.
9 Dan beaivvi daddjojuvvo:
Gehččet, dát lea min Ipmil!
Mii vurddiimet su, ja son besttii min.
Dát lea Hearrá, sutnje mii bijaimet doaivvu,
illudehkot ávus su bestojumi dihte.
10 Hearrá giehta várjala dán vári.
Muhto Moab dulbmojuvvo
nugo oalggat muhkkečáhcái.
11 Doppe dat geaigguha gieđaid
nugo heavvaneaddji dahká.
Hearrá doadjá dan goargatvuođa
beroškeahttá dan gávváluššamiin.
12 Dan alla ladnemuvrraid
son njeaidá eatnamii,
son cuvke daid moallun.