Go vuoigatlašvuohta ráđđe
1 Boahtá áigi
go gonagas ráđđe vuoigatlaččat
ja oaivámuččat stivrejit
vanhurskásit.
2 Dalle sii buohkat leat dego
beaittus go dálki boahtá,
dego suodji ráššoarvvi vuostá,
dego jogaš čázehis meahcis,
dego báktesuoivvan eatnamis
maid beaivváš goardá.
3 Dalle oidniid čalmmit eai leat gitta
ja gulliid bealjit leat gullesat.
4 Ráđehemiid váibmu oažžu ipmárdusa,
gahkáid njuovčča
sárdnu njuovžilit ja čielgasit.
5 Doavki ii šat gohčoduvvo gutnálažžan
iige skealbma ávddalažžan.
6 Doavki sárdnu aivve jallavuođa,
buot su áigumušat leat bahát.
Son meannuda ipmilmeahttumit
ja sárdnu jorgut Hearrá birra.
Son diktá nealgeolbmo nealgut
ja goikan olbmo goikat.
7 Skealmma vearjjut leat bahát,
su áigumušat leat heahpatlaččat,
su giellásat njeidet vártnuheami,
su sánit njeidet geafi rievttis.
8 Muhto buorrelunddot olbmo jurdagat
leat ávddalaččat,
son ovddida buot mii lea buorre.
Jerusalema ja Israela duopmu ja bestojupmi
9 Lihkket, dii moraškeahtes nissonat,
gullet mu sániid!
Dii oadjebas nieiddat,
guldalehket maid mun sártnun!
10 Oktii vel dii doarggistehpet,
dii geat dál lehpet oadjebasat.
Rádjanáigi lea vássán,
iige mihkkege leat ráddjojuvvon.
11 Suorganehket,
dii moraškeahtes nissonat,
doarggistehket,
dii oadjebas olbmot,
nuoladehket,
čatnet horstta alimiid birra.
12 Luibmet bealdduid dihte,
hearvás bealdduid,
šattolaš viidnemuoraid dihte,
13 luibmet mu álbmoga eatnamiid dihte,
gos bastilislánját ja gáskálasat bohciidit,
buot ávvudeaddji gávpoga
ilolaš viesuid dihte.
14 Šloahtta báhcá guorusin,
šlámaideaddji gávpot šaddá ávdimin.
Ofeldievvá ja fáktentoardna
báhcet rabas gieddin agibeaivái,
meahciáseniid ealáhin,
šibitealuid guohtumin.
15 Nu lea dassážii go min badjelii
golggahuvvo vuoigŋa allagasas.
Dalle ávdin meahcci šaddá šaddogárdin,
ja gárddit leat viidát dego vuovddit.
16 Dalle meahcis ássá vuoigatvuohta,
šaddogárddiin vuoigatlašvuohta.
17 Vuoigatlašvuođa duodji lea ráfi,
dan šattus lea bistevaš muossi
ja oadjebasvuohta.
18 Mu álbmot ássá ráfálaš eatnamis,
gođiin main sii dovdet leat oadjebasat
ja besset vuoiŋŋastit muosis.
19 Vuovdi gahččá vuolás,
gávpogat gaikojuvvojit
gitta eatnama ráje.
20 Lihkolaččat dii geat beassabehtet
gilvit buot johkagáttiide
ja luoitit vuovssáid ja áseniid
veaiddalassii!