Babylona lihkuhisvuohta
1 Vuolás muldii, nieida Babylon!
Čohkán eatnamii, Kaldea nieida,
dies lea dál du truvdnu!
Don it šat gohčoduvvo
jiellahin ja gealuhin.
2 Váldde millu, mále jáffuid!
Rabas beaittaliinni, lokte helmmiid,
nuola julggiid ja gále jogaid rastá!
3 Du heahpadat rahpasit,
du álásvuohta lea oaidnimis.
Go mun mávssahan,
de ii oktage sáhte hehttet mu,
4 nu cealká min lonisteaddji.
Su namma lea Hearrá,
Almmiveagaid Ipmil, Israela Bassi.
5 Čohkká jávohaga,
mana seavdnjadassii,
Kaldea nieida!
Don it šat gohčoduvvo riikkaid dronnegin.
6 Go mun moaráhuvven álbmogasan,
hilgon iežan opmodaga
ja adden dan du gihtii,
de don it árpmihan mu álbmoga.
Du geasis dettii velá vuoras olbmoge.
7 Don dadjet:
“Mun lean dronnet álo ja agálašvuhtii.”
Don it váldán dan váibmosat,
it smiehttan mo loahppa šaddá.
8 Gula dál, don gii ealát goargatvuođas,
gii čohkkát oadjebassan ja jurddašat:
“Ii oktage leat nugo mun!
Mun in goassege čohkká leaskan,
in goassege šatta mánáheapmin.”
9 Goappašat áššit deaividit du.
Fáhkkestaga, ovttahat beaivvi
don šattat mánáheapmin ja leaskan.
Dat deaividit du dievas fámuin,
vaikko dus leat noaidegoansttat
ja nana diidalohkosat.
10 Don ledjet oadjebas bahávuođastat,
don jurddašit: “Ii oktage oainne mu.”
Du viisodat ja diehtu čádjidahtii du,
ja don jurddašit: “Ii oktage leat mu láhkásaš!”
11 Muhto lihkuhisvuohta deaivida du,
itge don sáhte mánidit dan eret.
Heavahus gahččá du ala,
itge don sáhte hehttet dan soabahemiin.
Fáhkka du falleha heavvu
maid it lean vuordimin.
12 Geahččal dál diidalohkosiiddát
ja buot noaidegoansttaidat
maiguin don leat rassan
gitta nuorravuođa rájes.
Don soaittát oažžut dain veahki,
don soaittát suorggahit lihkuhisvuođa.
13 Don leat váibadan iežat
ollu áigumušaidatguin.
Divtte dál boahtit daid veahkehit du,
sii guđet dutket almmi ja gehččet násttiid,
geat juohke ođđa mánu muitalit
mii dus lea vuordagis.
14 Muhto sii leat dego sáđut,
dolla boaldá sin,
eai sii iežage sáhte báhtarit
dollanjuorššuin.
Eai dat leat hilat maid guoras
olmmoš biktalivččii,
ii dolla man gáttis olmmoš čohkohalašii.
15 Nu geavvá du noiddiide,
geaiguin don leat atnán searvevuođa
dan rájes go ledjet nuorra.
Sii čádjádallet iešguhtege guvlosis.
Ii oktage gájo du.