Israel, Hearrá bálvaleaddji ja álbmogiid čuovga
1 Gullet mu, gáiddus rittut,
guldalehket, álbmogat
mat lehpet gáidagasas!
Hearrá rávkkai mu
juo ovdal go mun riegádin,
son attii munnje nama
go mun ledjen vel eadnán goaŧus.
2 Son dagai mu njálmmi
bastilis miehkkin,
gieđas suoivanii son čiegai mu.
Son dagai mu bastilis njuollan,
vurkii mu njuollaskuhpposis.
3 Son celkkii munnje:
“Don leat mu bálvaleaddji, Israel,
dus mun čájehan iežan hearvásvuođa.”
4 Mun dadjen:
“Duššás mun lean váibadan iežan,
duššás lean golahan fápmon.
Dattetge mu vuoigatvuohta
lea Hearrá gieđas,
mu bálká lea Ipmila luhtte.”
5 Ja dál cealká Hearrá,
son guhte hábmii mu bálvaleaddjinis
juo eadnán goaŧus,
vai mun máhcahan Jakoba
ja čohkken Israela su lusa
– mun oaččun gudni
Hearrá čalmmiin,
ja mu Ipmil lea mu fápmu –
6 ná son cealká:
Ilá uhccán lea ahte
don leat mu bálvaleaddji
ja čuoččáldahtát fas Jakoba čearddaid,
máhcahat Israela olbmuid
geat ain leat áimmuin.
Mun dagan du álbmogiid čuovgan,
vai mu bestojupmi ollá
gitta eatnama ravddaid rádjái.
Hearrá gádju iežas álbmoga
7 Ná cealká Hearrá,
Israela Bassi, álbmoga lonisteaddji,
sutnje gean olbmot badjelgehččet
ja fasttášit,
ráđđejeddjiid šlávvii:
Gonagasat oidnet ja čuožžilit,
ráđđejeaddjit luoitádit
eatnamii du ovdii,
danin go Hearrá, Israela Bassi,
lea oskkáldas,
son guhte lea válljen du.
8 Ná cealká Hearrá:
Mun gulan du rohkosa árpmu áiggi,
mun veahkehan du bestojumi beaivvi.
Mun várjalan du,
ja du bokte mun dagan lihtu
iežan álbmogiin.
Eanan čuoččáldahttojuvvo
ja guđđojuvvon eananbihtát
juogaduvvojit.
9 Mun cealkkán fáŋggaide:
“Vulget olggos!”
ja daidda geat leat seavdnjadasas:
“Bohtet čuovgasii!”
Sii gávdnet guohtuma geaidnoguorain,
ealáhaga buot báljes dieváin.
10 Eai sii nealggo eaige goikka,
ii báhkka iige beaivváš vahágahte sin.
Son gii árpmiha sin,
láide sin ja doalvu sin
čáhccás ádjagiid gáddái.
11 Mun dagan buot váriid geaidnun,
ráhkadan luottaid allagassii.
12 Geahča, sii bohtet guhkkin:
Duot davvin, duot oarjin
ja duotgis Assuana eatnamis.
13 Ávvut, albmi! Illut, eanan!
Čurvot ávvučuorvasiid, várit!
Hearrá jeđđe iežas álbmoga,
son árpmiha vártnuhis olbmuidis.
Hearrá ii vajáldahte Siona
14 Sion celkkii:
“Hearrá lea hilgon mu,
Ipmil lea mu vajáldahttán.”
15 Vajáldahttágo eadni njammimánás,
iigo son árpmit máná
gean ieš lea riegádahttán?
Vaikko vel son vajáldahtášiige,
de mun in goassege vajáldahte du.
16 Mun lean čállán du nama
goappašiid goapmerváibmosii,
ja du muvrrat leat álo mu čalmmiid ovddas.
17 Dat geat huksejit du,
bohtet hoahpus,
du gaikkodeaddjit ja billisteaddjit
gáidet eret.
18 Bajit čalmmiid ja geahča birra!
Sii čoahkkanit buohkat
ja bohtet du lusa!
Nu duohta go mun ealán, cealká Hearrá,
don gárvodat sin dego čiŋa,
nugo moarsi
don beasat giessat sin iežat birra.
19 Du viesut ledje čievračopman
ja bealddut ávdimin,
oppa du eanan lei visot gaikojuvvon.
Muhto dál dat šaddá
ilá gáržin ássiidasas!
Du heavaheaddjit leat gáidan.
20 Du mánáhisvuođa áiggi mánát
dadjet guhtet guoibmáseaset du gullut:
“Dát báiki lea midjiide ilá gárži.
Čáhkke saji, vai munge čágan ássat!”
21 Dalle don jearat váimmustat:
“Gii lea riegádahttán dáid munnje?
Munhan ledjen mánáheapme
ja sahkuheapme,
báđar ja hilgojuvvon.
Gii de lea šaddadan dáid?
Mun ledjen báhcán okto –
gos dát dalle ledje?”
22 Ná cealká Hearrá Ipmil:
Mun lokten gieđa, rávkkan álbmogiid
ja ceggen iežan soahteleavgga.
Dat bohtet, buktet du bártniid salas,
guddet du nieiddaid sealggis.
23 Gonagasat šaddet sin biebmoáhččin
ja dronnegat sin njamaheaddjin.
Sii luoitádit eatnamii du ovdii
ja njollot gavjja du julggiin.
Dalle don ipmirdat
ahte mun lean Hearrá:
Dat geat vurdet mu,
eai šatta heahpadii.
24 Sáhttágo giige soahteolbmás
váldit sállaša,
beasságo fáŋga báhtarit
árpmuhis olbmos?
25 Dasgo Hearrá cealká:
Fáŋga váldojuvvo soahteolbmás
ja sálaš rieviduvvo árpmuhis olbmos!
Mun soađan daiguin geat sohtet duinna,
ja du mánáid mun gájun.
26 Mun bijan du sordiid borrat
iežaset oačči,
sii juhkaluvvet iežas varas dego viinnis.
Dalle buot mii eallá ipmirda
ahte mun, Hearrá, lean du beasti,
ahte du lonisteaddji lea Jakoba Veagalaš.