Hearrá tempel lea rabas buohkaide
1 Ná cealká Hearrá:
Dahket dan mii lea riekta,
ja meannudehket vuoigatlaččat,
dasgo mu bestojupmi lea lahka,
mun almmustahtán fargga
iežan vanhurskkisvuođa.
2 Ávdugas dat gii dahká ná,
dat olmmoš gii doallá dás gitta,
dat gii doallá sabbaha
iige rihko dan bassivuođa,
gii ii eisege daga maidege baháid.
3 Allos vieris gii lea searvan Hearrái,
daddjo:
“Hearrá čuoldá mu iežas álbmogis”,
allosge gálddat daddjo:
“Munhan lean goikan muorra.”
4 Danin go Hearrá cealká ná:
Maiddái gálddahiidda
geat dollet mu sabbahiid,
geat dahket maid mun dáhtun
ja dollet mu lihtu,
5 mun attán viesustan,
muvrraidan siskelis,
muitomearkka ja nama.
Mun attán sidjiide dan mii lea buoret
go bártnit ja nieiddat: Agálaš nama,
mii ii sihkkojuvvo.
6 Vierrásat geat servet Hearrái
ja dáhttot bálvalit su,
geat ráhkistit Hearrá nama
ja gudnejahttet su,
buohkat geat dollet sabbaha
eaige daga dan eahpebassin,
muhto dollet mu lihtu,
7 besset boahtit mu bassi várrái.
Sii ožžot illudit go sii rohkadallet doppe.
Mun válddán vuostá sin boaldinoaffariid
ja njuovvanoaffariid
maid sii buktet mu áltára ala.
Ja mu tempel gohčoduvvo viessun
gos buot álbmogat ožžot rohkadallat.
8 Ná cealká Hearrá Ipmil,
son guhte čohkke biđgejuvvon Israela:
Velá eanebuid mun čohkken deike
daid lusa geat leat juo čohkkejuvvon.
Álbmoga čalmmehis várdájeaddjit
9 Bohtet, buot meahcispiret,
bohtet borrat, visot vuovddi eallit!
10 Dán eatnama várdájeaddjit
leat buohkat čuovggaheamit,
eai sii fuomáš maidege.
Sii leat buohkat dego gielahis beatnagat
mat eai máhte ciellat,
dušše veallájit adjágasas ja liikojit oađđit.
11 Muhto dát leat vuovdás beatnagat,
mat eai gallán goassege.
Ja sii galget leat báimmanat,
sii geat eai ipmir maidege?
Sii buohkat spiehkastit iežaset geidnui,
juohkehaš bivdá iežas ovddu.
12 Sii dadjet: “Bohtet, mun vieččan viinni,
de mii juhkat gárremiidda!
Ja ihttáš beaivi lea dego otná beaivi
ja velá buoretge!”