Soahti benjaminlaččaiguin
1 Buot israellaččat Dana rájes gitta Beer Šeba rádjái ja vel Gileadis, johttájedje, ja oppa searvegoddi čoagganii Hearrá ovdii Mispai. 2 Israela oaivámuččat, buot čearddaid njunušolbmát, ja oppa Ipmila álbmot čoagganedje oktasaš čoahkkimii, njeallječuođiduhát vearjoolbmá. 3 Benjaminlaččat gulle ahte israellaččat ledje čoagganan Mispai.
Israellaččat dadje: “Muital, mo dát bahádahku dáhpáhuvai!” 4 Levilaš, dan goddojuvvon nissona boadnji, muitalii: “Moai liigeáhkáin bođiime Benjamina Gibeai vai besse orrot dohko idjii, 5 muhto Gibea olbmát vigge fallehit mu ja birastahtte ihkku dan viesu gos mun ledjen. Sii áigo goddit mu, ja mu liigeáhká sii illastedje nu ahte son jámii. 6 Dalle mun čuohpadin liigeáhkkán ja vuolggahin bihtáid miehtá Israela eatnama, danin go gibealaččat ledje dahkan dakkár fasttes vearredagu Israelis. 7 Israellaččat, dii lehpet dál buohkat dás. Guorahallet dál ášši ja dadjet, maid galggašii dahkat!”
8 Oppa álbmot čuožžilii, ja sii celke: “Ii oktage mis oaččo máhccat, ii oktage vuolgit ruktosis. 9 Mii dahkat Gibeai ná: Mii fallehit dan, muhto vuos mii vuorbádit. 10 Mii váldit buot Israela čearddain logi olbmá čuohtásis ja čuohtása duháhis ja duháha logiduháhis. Sii galget háhkat biepmu soahtevehkii go dat manná mávssahit Benjamina Gibeai dan fasttes bahádagu maid sii leat dahkan Israelis.” 11 Israellaččat mearridedje ovttamielalaččat vuolgit soahtat Gibeain.
12 Israela čearddat vuolggahedje olbmáid cealkit buot Benjamina sogaide: “Din gaskkas lea dahkkojuvvon fasttes vearredahku. 13 Addet dal min gihtii Gibea bahádahkkiid, vai mii beassat goddit sin ja duššadit bahá Israelis.” Muhto benjaminlaččat eai dáhtton gullat israellaš vieljaideaset, 14 muhto čoagganedje iežaset gávpogiin Gibeai soahtat israellaččaiguin. 15 Dan beaivvi geahčaduvvojedje dat geat ledje boahtán Benjamina gávpogiin, ja sii ledje guoktelogiguhttaduhát olbmá. Dasa lassin ledje vel dat geat ásse Gibeas, 16 čiežačuođi gurutgieđat válljusoahteolbmá geat buohkat máhtte šleŋget geađggi meattekeahttá vuoktačalmmi njeaiga.
17 Israellaččatge geahčaduvvojedje, ja go benjaminlaččat eai lean mielde, de sii ledje njeallječuođiduhát olbmá, buohkat árjjálaš soahteolbmát. 18 Sii manne Betelii jearrat Ipmilis: “Guhtemuš mis galgá vuolgit ovddimustá soahtat benjaminlaččaiguin?” Hearrá vástidii: “Juda galgá vuolgit ovddimustá.”
19 Maŋit iđida israellaččat johttájedje ja luoitaledje Gibea lahka. 20 Nu sii vulge soahtat benjaminlaččaiguin ja divvo iežaset soahtan láhkái Gibea olggobeallái. 21 Benjaminlaččat bohte olggos gávpogis ja godde dan beaivvi guoktelogiguokteduhát israellačča. 23 Dalle israellaččat manne Betelii ja čirro Hearrá muođuid ovddas gitta eahkeda rádjái. Sii jerre: “Galgatgo mii ain soahtat vieljaineamet Benjaminiin?” Hearrá vástidii: “De galgabehtet!” 22 Dalle israellaččat roahkasmuvve ja divvo iežaset soahtan láhkái seammá báikái go ovddit beaivvige. 24 Go israellaččat maŋit beaivvi vulge soahtat, 25 de benjaminlaččat bohte olggos Gibeas ja godde vel gávccinuppelohkáiduhát soahteolbmá. 26 Oppa israellaččaid soahteveahka manai fas Betelii. Doppe sii čohkkájedje Hearrá muođuid ovddas ja čirro. Dan beaivvi sii fástudedje gitta eahkeda rádjái ja oaffarušše Hearrái boaldinoaffariid ja searvevuođaoaffariid 27 ja jerre Hearrás rávvaga. Dan áigge Ipmila lihtuárka lei Betelis, 28 ja Pinehas, Elasara bárdni ja Arona áddjut, bálvalii doppe Hearrá muođuid ovddas. Sii jerre: “Galgatgo mii velá oktii mannat soahtat vieljaineamet Benjaminiin, vai galgatgo mii heaitit?” Hearrá vástidii: “Mannet soahtat! Ihttin mun divttán sin vuoittáhallat didjiide.”
29 Israellaččat bidje olbmáid beitosii Gibea birra. 30 Goalmmát beaivvi sii vulge Gibea olggobeallái soahtat benjaminlaččaiguin nugo ovddit gerddiidge. 31 Go benjaminlaččat bohte olggos gávpogis, de sii gessojuvvojedje guhkás gávpoga luhtte. Álggos sii vuite nugo ovddit gerddiidge ja godde sullii golbmalogi israellačča daid máđijaid ala main nubbi manai Betelii ja nubbigis meahci čađa Gibeonii.
32 Dalle benjaminlaččat jurddašedje: “Mii vuoitit sin dego ovdalge”. Muhto israellaččaid áigumuš lei báhtarit ja geassit sin máđijaid ala, guhkás gávpogis. 33 Israellaččat geassádedje ja divvo iežaset soahtan láhkái Baal-Tamarii. Dalle dat geat ledje beitosis gibealaččaid duogábealde, bohte ovdan vuođgŋinsajiineaset. 34 Logiduhát israellaš válljusoahteolbmá fallehedje Gibea. Soahti lei garas, eaige benjaminlaččat ipmirdan ahte lihkuhisvuohta lei juksamin sin. 35 Hearrá divttii benjaminlaččaid vuoittáhallat Israelii, ja dan beaivvi israellaččat godde guoktelogivihttaduhát ja čuođi benjaminlaš soahteolbmá. 36 Benjaminlaččat ipmirdedje dál ahte sii ledje vuoittáhallamin. Soahti manai ná: Israellaččat geassádedje benjaminlaččaid ovddas, danin go sii luhtte daidda geaid ledje bidjan beitosii Gibea birra. 37 Dat geat ledje vuođgŋimin dopme fallehit Gibea, bahkkejedje gávpogii ja godde buohkaid. 38 Israellaččat ledje soahpan vuđgŋiiguin ahte sii galge bidjat suhkkes suova badjánit gávpogis. 39 Soađis israellaččat jorggihedje álggos báhtui. Go benjaminlaččat ledje goddán sullii golbmalogi israellačča, de sii jurddašedje: “Vissásit mii vuoitit sin nugo ovddit dáistaleamisge.” 40 Muhto dalle gávpogis badjánišgođii suhkkes suovva, ja go benjaminlaččat jorggihedje geahččat, de sii oidne gávpoga mannamin suovvan almmi guvlui.
41 Dál israellaččat jorggihedje ruoktot, ja benjaminlaččat suorganedje go sii oidne ahte lihkuhisvuohta lei juksan sin. 42 Sii báhtaredje israellaččain meahci guvlui, muhto doarrideaddjit čuvvo sin šušmmi duohken. Benjaminlaččat šadde israellaččaid váldojoavkku ja daid gaskii geat ledje leamaš gávpogis. 43 Israellaččat časke benjaminlaččaid ja doarridedje sin, dassá go jukse sin Gibea nuorttabealde. 44 Benjaminis gahčče gávccinuppelohkáiduhát olbmá geat buohkat ledje árjjálaš soahteolbmát. 45 Earát jorggihedje ja báhtaredje meahccái Rimmonbávtti guvlui. Israellaččat godde máđijaid ala velá vihttaduhát olbmá, doarridedje sin gitta Gidoma rádjái ja godde vel guokteduhát olbmá. 46 Benjaminlaččain gahčče dan beaivvi guoktelogivihttaduhát olbmá geat buohkat ledje árjjálaš soahteolbmát. 47 Dušše guhttačuođi benjaminlačča besse báhtui meahccái Rimmonbáktái, ja doppe sii orro njeallje mánu.
48 Israellaččat máhcce Benjamina eatnamii ja godde buot maid deive, buot gávpogiid olbmuid ja elliid, ja buolláhedje buot gávpogiid.