Billašuvvan beallemasboagán
1 De Hearrá celkkii munnje: “Mana oastit alccesat beallemasboahkána ja čana dan alimiiddát birra, muhto várut njuoskadeames dan.” 2 Mun osten boahkána nugo Hearrá lei gohččon, ja čatnen dan alimiiddán birra. 3 Dalle Hearrá sátni bođii munnje nuppádassii: 4 “Váldde boahkána maid ostet ja mii lea alimiiddát birra, ja mana Eufratii. Čiega dan dohko bákteráhkamii.” 5 Mun mannen ja čihken dan Eufratii, nugo Hearrá lei gohččon. 6 Guhkes áiggi geažes Hearrá celkkii munnje: “Mana Eufratii viežžat dan boahkána maid mun gohččon du čiehkat dohko.” 7 Mun mannen Eufratii ja roggen boahkána bajás dan sajis masa ledjen čiehkan dan. Muhto boagán lei billašuvvan iige dohkken šat maninge. 8 Dalle Hearrá sátni bođii munnje: 9 Ná cealká Hearrá: Seamma láhkai mun doaján Juda ja Jerusalema stuora čeavlli. 10 Dát bahás álbmot biehttala gullamis mu sániid. Dan váibmu lea buššon, dat manná eará ipmiliid maŋis ja bálvala ja gopmirda daid. Danin dasa geavvá nugo dán boahkánii mii ii dohkke šat maninge. 11 Nugo olmmái čatná boahkána alimiiddis birra, nu munge lean čatnan oppa Israela álbmoga ja Juda álbmoga alccesan, cealká Hearrá. Dat galge leat mu álbmot, munnje gudnin, rámádussan ja čikŋan, muhto dat eai dáhtton gullat.
Cuvkejuvvon viidneruhkut
12 Cealkke sidjiide dán sáni: Ná cealká Hearrá, Israela Ipmil: Juohke viidneruhkku devdojuvvo viinniin. Ja jos sii dadjet dutnje: “Eatgoson mii dieđe ahte juohke viidneruhkku devdojuvvo viinniin?” 13 de vástit: Ná cealká Hearrá: Mun deavddán viinniin buot dán eatnama ássiid ja gárihuhtán sin, sihke gonagasaid geat čohkkájit Davida truvnnus ja báhpaid, profehtaid ja buot Jerusalema ássiid. 14 Mun cuvken sin nuppi nuppi vuostá, sihke áhčiid ja bártniid, cealká Hearrá. Mun in árpmit, in árkkáš inge seastte; mun duššadan sin.
Várrehus ja ráŋggáštus
15 Gullet! Guldalehket!
Allet čeavllástala,
dasgo Hearrá ieš sárdnu.
16 Addet gudni Hearrái, Ipmilasadet,
ovdal go son diktá sevnnjodit,
ovdal go din juolggit čuhcet
moskováriide.
Dalle dii vuordibehtet čuovgasa,
muhto son dahká dan jápminsuoivvanin,
suhkkes seavdnjadassan.
17 Muhto jos dii ehpet gula,
de mun čierun čihkosis
din čeavláivuođa dihte.
Mun čierun bahččagit,
gatnjalat golget mu čalmmiin,
go Hearrá eallu dolvojuvvo fáŋgavuhtii.
18 Celket gonagassii ja gonagasa eadnái:
Njieddji alla sajisteatte,
dasgo hearvás kruvdnu lea
gahččan dudno oaivvis.
19 Negeva gávpogat leat dahppojuvvon,
iige oktage raba daid.
Oppa Juda lea dolvojuvvon fáŋgavuhtii,
dolvojuvvon juohke olmmoš.
20 Bajidehket čalmmiid ja gehččet daid
geat bohtet davvin!
Gos dál lea eallu
mii dutnje lea oskkilduvvon,
du ebmos sávzzat?
21 Maid don dajat,
go Hearrá bidjá dutnje oaivámužžan daid
geaid don leat hárjánan atnit ustibin?
Eaigo dalle ávttat čárvvo du
dego riegádahtti nissona?
22 Don dajat váimmustat:
“Manne munnje lea geavvan dán láhkai?”
Du ollu vearredaguid geažil
du bivttashealmmit leat bajiduvvon
ja don leat heahppášuhttojuvvon!
23 Sáhttágo nubialaš muhttit liikkis
dahje leopárda girjjiidis?
Dalle diige sáhtášeiddet dahkat buriid,
guđet lehpet hárjánan dahkat baháid.
24 Mun biđgen din dego oalggaid
maid meahci biegga girddiha.
25 Dát šaddá du vuorbi,
du mihtiduvvon oassi
maid mun lean mearridan dutnje,
cealká Hearrá,
dainna go don vajáldahttet mu
ja dorvvastit giellásii.
26 Mun ieš bajidan du bivttashelmmiid
du oaivvi badjel,
vai du heahpat oidno.
27 Mun lean oaidnán du náittosrihkkumiid,
du hirdnumiid ja du heahpatlaš furrošeami.
Dieváin ja meahcis
mun lean oaidnán du fastivuođaid.
Vuoi du, Jerusalem, go it buhtásmuva!
Man guhká dát bistteš?