1 Báhppa Pašhur, Immera bárdni, Hearrá viesu bajimuš goziheaddji, gulai maid Jeremia profehtastalai. 2 Dalle son cápmii profehta Jeremia ja bijai su gitta čoskii bajit Benjaminpoartta gurrii, gokko beassá Hearrá vissui. 3 Go Pašhur maŋit beaivvi luittii Jeremia luovos, de Jeremia dajai sutnje: Hearrá ii gohčot du šat namain Pašhur, muhto namain Magor-Missabib, Suorggahus juohke sajis! 4 Ná cealká Hearrá: Mun dagan du suorggahussan alccesat ja iežat ustibiidda. Du oaidnut sii gahččet vašálaččaid miehkkái. Mun attán oppa Juda Babylona gonagasa gihtii. Son doalvu dan olbmuid Babylonii ja goddá sin mihkiin. 5 Mun attán buot dán gávpoga riggodagaid ja buot dan fidnemušaid dan vašálaččaid gihtii, buot dan mávssolaš gálvvuid ja buot Juda gonagasaid dávviriid. Dat rieviduvvojit ja dolvojuvvojit Babylonii. 6 Don, Pašhur, ja buohkat geat ásset du viesus, šaddabehtet fáŋgan Babylonii. Dohko don jámát ja dohko don hávdáduvvot, don ja buot du ustibat geaidda don leat einnostan giellásiid.
Jeremia váidalus
7 Hearrá, don leat fillen mu,
ja mun lean diktán iežan fillehallat.
Don leat šaddan munnje menddo gievran
ja leat bihtán.
Beaivvis beaivái mun lean
olbmuid bogostahkan,
buohkat hiddjidit mu.
8 Nu dávjá go mun sártnun,
de mun ferten čuorvut,
gulahit veahkaválddi ja duššadeami.
Hearrá sátni lea šaddan munnje
hiddjádussan ja bilkádussan
beaivvis beaivái.
9 Muhto go mun dadjen:
“Mun in áiggo jurddašit su
inge šat sárdnut su nammii”,
de lei dego dolla livččii buollán
mu siskkildasas,
dahppasan mu dávttiide.
Mun lean rahčan gierdat dan,
muhto in šat nagot.
10 Mun lean gullan
eatnagiid savkkuheamen:
“Suorggahus lea juohke sajis!
Guoddalehket su! Mii guoddalit su!”
Velá mu ustibat fáktejit,
dušše vurdet jogo mun gahčašin:
“Son sáhttá iežas diktit fillejuvvot,
nu ahte mii bihtit sus
ja beassat mávssahit sutnje.”
11 Muhto Hearrá lea muinna
dego veagalaš gievra,
mu doarrádallit guossalit
eaige biđe mus.
Sii heahppášuhttojuvvojit,
danin go sii eai leat meannudan viisát,
sii ožžot heahpada
mii ii goassege vajálduva.
12 Hearrá, Almmiveagaid Ipmil,
don geahččalat vuoigatlačča,
don guorahalat váimmu ja jurdagiid.
Divtte mu oaidnit go don mávssahat sidjiide,
dasgo du háldui mun lean oskkildan áššán.
13 Lávlot Hearrái, máidnot Hearrá!
Son beastá váivváša bahádahkkiid gieđas.
14 Garuhuvvon lehkos dat beaivi
go mun riegádin!
Allos lehko buressivdniduvvon dat beaivi
go eadnán riegádahtii mu!
15 Garuhuvvon lehkos dat olmmái
gii buvttii mu áhččái illusága:
“Dutnje lea riegádan bárdni”,
ja illudahtii su sakka.
16 Vare dan olbmái geavašii
dego gávpogiidda
maid Hearrá duššadii árpmitkeahttá!
Vare son gulašii bárguma iđđedis,
soahtečuorvasa beaiveguovdil,
17 danne go ii goddán mu eadnán goŧŧui!
Eadnán livččii šaddan mu hávdin
ja bisson áhpeheapmin álohii.
18 Manne mun galgen boahtit
eadnán goaŧus
oaidnit váivvi ja morraša,
nu ahte mu beaivvit vásset heahpadis?