Jeremia

Jeremia sárdnu tempelis

¹ Juda gonagasa Jojakima, Jošia bártni, ráđđenáiggi álggus Jeremiai bođii dát Hearrá sátni. ² Hearrá celkkii sutnje: Mana Hearrá tempela ovdašilljui. Go Juda gávpogiid olbmot bohtet tempelii rohkadallat, de sártno sidjiide buot maid mun gohčun du sárdnut. Ale divtte ovttage sáni báhcit eret! ³ Sii vedjet gullat du ja jorgalit bahás geainnuineaset, ja nu mun gáđan dan bahá maid lean áigon dahkat sidjiide sin bahás daguid dihte ⁴ Cealkke sidjiide: Ná cealká Hearrá: Jos dii ehpet gula mu ja doala lága maid mun lean addán didjiide, ⁵ ehpetge gula mu bálvaleddjiid profehtaid geaid mun lean vuolggahan din lusa ain ođđasis, vaikko dii ehpet leatge dáhtton gullat sin sániid, ⁶ de mun dagan dán tempelii dego Šiloi, ja dán gávpoga nama buot eatnama álbmogat atnet garuhussan.

⁷ Báhpat ja profehtat ja oppa álbmot gulle visot maid Jeremia sártnui Hearrá tempelis. ⁸ Go son lei geargan sárdnumis buot maid Hearrá lei gohččon su sárdnut oppa álbmogii, de dohppejedje báhpat ja profehtat ja oppa álbmot su ja dadje: “Don galggat jápmit! ⁹ Manne don sártnut Hearrá nammii ja dajat: Dán tempelii geavvá dego Šiloi, ja dát gávpot šaddá ávdimin ja guorusin?” Ja oppa álbmot čoagganii Jeremia birra Hearrá tempelii.

¹⁰ Go Juda oaivámuččat gulle dan, de sii vulge gonagasa šloahtas Hearrá tempelii ja čohkánedje ođđa tempelpoartta gurrii. ¹¹ Dalle báhpat ja profehtat dadje oaivámuččaide ja oppa álbmogii: “Dát olmmái ferte jápmit, danne go son lea profehtastallan min gávpoga vuostá, nugo dii ieža lehpet gullan.”

¹² Dalle Jeremia dajai oaivámuččaide ja oppa álbmogii: “Hearrá lea vuolggahan mu profehtastallat dán tempela ja dán gávpoga vuostá buot daid sániid maid dii lehpet gullan. ¹³ Jorgalehket vearregeainnuineattet, hilgot bahás daguideattet ja gullet Hearrá, din Ipmila! Dalle Hearrá gáhtá dan bahá mainna son lea áitán din. ¹⁴ Mun lean din gieđas; dahket munnje mii din mielas lea buorre ja vuoigat. ¹⁵ Muhto muitet: Jos dii goddibehtet mu, de sihke dii ja oppa gávpot šaddabehtet sivalažžan vigihis olbmá varrii, danne go Hearrá lea duođaid vuolggahan mu sárdnut buot dáid sániid didjiide.”

¹⁶ Dalle oaivámuččat ja oppa álbmot celke báhpaide ja profehtaide: “Ii dán olbmá oaččo dubmet jápmimii! Sonhan lea sárdnon midjiide Hearrá, min Ipmila, nammii.” ¹⁷ Muhtumat álbmoga vuorrasiin dadje álbmogii mii lei das čoahkis: ¹⁸ “Hiskia, Juda gonagasa, beivviid profehtastalai morešetlaš Mika. Son sártnui oppa Juda álbmogii: Ná cealká Hearrá, Almmiveagaid Ipmil:

Sion jorgojuvvo bealdun,

Jerusalem šaddá čievračopman

ja tempelvári alážat vuovdiluvvet.

¹⁹ Goddego dalle gonagas Hiskia ja Juda álbmot su? Almma gonagas balai Hearrás ja ánuhii sus árpmu? Nu Hearrá gáđai dan bahá mainna lei áitán sin. Mii leat dagaheamen alcceseamet stuorra oasehisvuođa.”

Profehta Uria sorbmejuvvo

²⁰ De lei maiddái nubbi olmmái gii profehtastalai Hearrá nammii. Son lei Uria, Šemaja bárdni, Kirjat-Jearima olmmoš. Son profehtastalai Jerusalema ja dán eatnama vuostá seamma láhkái go Jeremia. ²¹ Go gonagas Jojakim ja buot su soahteolbmát ja oaivámuččat gulle Uria sániid, de gonagas dáhtui goddit su. Muhto go Uria gulai dan, de son suorganii ja báhtarii Egyptii. ²² Gonagas Jojakim vuolggahii Elnatana, Akbora bártni, ja soames eará olbmáid Egyptii Uria maŋŋái. ²³ Sii vižže su Egyptas ja bukte su gonagas Jojakima ovdii. Son gottii su mihkiin ja suhppii su rupmaša geafes olbmuid hávdesadjái.

²⁴ Muhto Ahikam, Šafana bárdni, suodjalii Jeremia, nu ahte son ii gártan álbmoga gihtii iige gottáhallan.