Ukraina flaggRedder Bibelen liv i Ukraina?
Finn ut mer
Gå til forsiden

Jeremia

31 

1 Daid áiggiid, cealká Hearrá, mun lean buot Israela sogaid Ipmil, ja dat leat mu álbmot.

Israel máhccá iežas eatnamii

2 Ná cealká Hearrá:

Álbmot mii beasai báhtui miehkis,

oaččui árpmu ávdin meahcis.

Israel máhccá fas iežas eatnamii

ja gávdná ráfi.

3 Hearrá almmustuvai munnje,

son bođii guhkkin ja celkkii:

Agálaš ráhkisvuođain

mun lean ráhkistan du,

danne mun lean leamaš

dutnje buorre guhkes áiggi.

4 Mun huksen du ođđasis,

ja don huksejuvvot, nieida Israel.

Don čiŋadat fas, válddát giehtarumbbu

ja manat dánsut illudeddjiiguin.

5 Don gilvvát fas viidnegárddiid

Samaria váriide,

ja dat geat gilvet

besset maid rádjat šaddosiid.

6 Boahtá beaivi

go várdájeaddjit čurvot Efraimváris:

Bohtet, vulgot Sionii

Hearrá, min Ipmila, lusa!


7 Ná cealká Hearrá:

Ávvudehket ja illudehket Jakoba dihte,

čurvot ávus álbmogiid oaivámužžii!

Máidnot Hearrá, celket:

“Hearrá lea beastán iežas álbmoga,

Israela bázahasa!”

8 Mun buvttán sin davvieatnamis,

čohkken sin eatnama olggumuš ravddain.

Sin searvvis leat čalmmeheamit

ja skierpmát,

áhpeheamit ja riegádahttit.

Stuorra joavkun sii máhccet deike.

9 Sii bohtet čieru,

muhto mun jeđđen ja oahpistan sin.

Jalges geainnu gokko sii eai jorral,

mun doalvvun sin čáhceádjagiid gáddái.

Dasgo mun lean Israela áhčči,

ja Efraim lea mu vuosttašriegádeaddji.


10 Álbmogat, gullet Hearrá sáni!

Gulahehket dan gáiddus mearragáttiide,

dadjet:

Son guhte biđgii Israela, čohkke dan fas,

son gáhtte dan dego báimman ealus.

11 Hearrá lonista Jakoba

ja beastá su soardi gieđas.

12 Sii bohtet ja ávvudit Siona dievás,

sin muođut báitet ilus

Hearrá buriid attáldagaid dihte.

Son addá gortni, viinni ja oljju,

sávzzaid ja vuovssáid.

Sii leat ieža dego bures

láktaduvvon gilvvagárdi,

eai sii goassege šat vuoimmehuva.

13 Dalle nieida illuda dánsumiin,

nuorat ja boarrásat searválagaid.

Sii leat šaddan gillát,

muhto mun jorgalan sin morraša ávvun,

mun jeđđen ja illudahtán sin.

14 Mun gallehan báhpaid oaffarbuiddiin

ja biepman álbmogan

buriid attáldagaiguin,

cealká Hearrá.


15 Ná cealká Hearrá:

Jietna gullo Ramas,

váidalus ja bahča čierrun.

Rakel čierru mánáidis

iige leat jeđđemis,

danne go sii eai leat šat.

16 Ná cealká Hearrá:

Heaitte čierrumis,

sihko gatnjaliid čalmmiin!

Don oaččut bálkká rahčamisttát:

Du mánát máhccet vašálaččaid eatnamis,

cealká Hearrá.

17 Dus lea boahtteáiggi doaivu:

Du mánát máhccet iežaset eatnamii,

cealká Hearrá.


18 Mun lean gullan

Efraima váidaleamen:

Don, Hearrá, bagadit mu,

mun bagaduvvojin

dego dámakeahtes gálbi.

Jorgalahte mu, de mun jorgalan,

dasgo don leat Hearrá, mu Ipmil.

19 Mun jorgalin eret,

muhto dál mun gáđan.

Mun jirbmen,

ja dál mun speaččun alimiiddán.

Dál mun heahpanattan,

mun gillán iežan nuorravuođa heahpada.

20 Almma Efraim lea mu ráhkis bárdni,

mu jiellatmánná?

Vaikko mun lean velá dávjáge

sárdnon su vuostá,

de mun in sáhte vajáldahttit su.

Mu siskkildas njuorrá su dihte,

mun ferten árpmihit su, cealká Hearrá.


21 Bardde bálggesuraid,

dihkkát geainnu!

Váldde vuhtii dan geainnu,

dan bálgá man leat vádjolan.

Jorgal ruoktot, nieida Israel,

máhca gávpogiiddásat!

22 Man guhká don vel áiggut mohkohallat,

jorralan nieida?

Dál Hearrá sivdnida eatnamis

juoga ođđasa:

Nisson gáhtte olbmá.


23 Ná cealká Hearrá, Almmiveagaid Ipmil, Israela Ipmil: Go mun jorgalan Juda vuorbbi, de ohpihii celkojuvvojit dát sánit Juda eatnamis ja dan gávpogiin: “Hearrá buressivdnidehkos du, bassi várri, vanhurskkisvuođa ássansadji!” 24 Juda eatnamis ja buot dan gávpogiin ásset olbmot – eanandoallit searválagaid daiguin geat johtet ealuiguin, ásset doppe. 25 Mun áhpásmahtán viessan olbmo, gallehan dan gii lea vuoimmehuvvan.

26 Dasa mun morihin ja geahčadin iežan birra. Nagir lei munnje njálggis.

27 Beaivvit bohtet, cealká Hearrá, go mun gilvván Israelii ja Judai olbmuid ja elliid. 28 Nugo mun lean atnán fuola das ahte Israel ja Juda gaikojuvvojit ja njeidojuvvojit, biđgejuvvojit ja duššaduvvojit ja daidda dagahuvvo oasehisvuohta, de dál mun anán fuola das ahte dat huksejuvvojit ja gilvojuvvojit, cealká Hearrá. 29 Daid beivviid ii šat daddjojuvvo:

Áhčit borre suvrra viidnemurjjiid,

mánáid bánit raššo.

30 Juohkehaš jápmá iežas suttuid dihte,

ja gii borrá suvrra viidnemurjjiid,

dan bánit raššot.

31 Bohtet beaivvit, cealká Hearrá, go mun dagan ođđa lihtu Israela viesuin ja Juda viesuin, 32 in dakkára go dat lihttu maid mun dahken sin áhčiiguin dalle go válden sin gihtii ja bukten sin Egyptas. Dan lihtu sii rihkko, vaikko mun ledjen váldán sin oapminan, cealká Hearrá. 33 Muhto dán lihtu mun dagan Israela viesuin boahtti beivviid, cealká Hearrá: Mun bijan iežan lága sin siskkildassii ja čálán dan sin váibmui. Mun lean sin Ipmil, ja sii leat mu álbmot. 34 Dalle ii oktage šat oahpat lagamuččas iige vieljas ja daja: “Dovdet Hearrá!” Danin go sii buohkat, sihke smávvát ja stuorrát, dovdet mu, cealká Hearrá. Mun attán sin rihkkumiid ándagassii inge šat muitte sin suttuid.

35 Hearrá lea bidjan beaivváža

čuovggasin beaivái,

mánu ja násttiid lágaideaset mielde

čuovggasin idjii.

Son stuimmáskahttá meara,

nu ahte dan bárut máraidit,

– Hearrá, Almmiveagaid Ipmil, lea su namma,

36 ja son cealká:

Go dát ortnet ii šat biso,

dalle Israela álbmot heaitá leames

agálašvuhtii leames mu álbmot.


37 Ná cealká Hearrá:

Jos almmit badjin sáhttet mihtiduvvot

ja eatnama vuođđudusat sáhttet dutkojuvvot,

de easkka dalle mun hilggun Israela náli

buot dan dihte maid sii leat dahkan,

cealká Hearrá.

38 Beaivvit bohtet, cealká Hearrá, go Jerusalem huksejuvvo fas mu gávpogin, Hananeltoartna rájes gitta Čiehkapoartta rádjái. 39 Ja mihttobáddi manná guhkibuidda njuolga Garebdievvái ja doppe Goai. 40 Oppa leahki gosa jábmit leat hávdáduvvon ja oaffarelliid gunat biđgejuvvon, ja buot steallit gitta Kedronjogaža ja nuortin gitta Heastapoartta rádjái leat dalle basuhuvvon Hearrái. Dat gávpot ii šat goassege gaikojuvvo iige duššaduvvo.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.