Baruk čállá Jeremia sániid girjegerrui
1 Juda gonagasa Jojakima, Jošia bártni, njealját ráđđenjagi bođii Jeremiai dát sátni Hearrás: 2 Váldde girjegearu ja čále dasa buot daid sániid maid mun lean sárdnon dutnje Israela ja Juda ja buot eará álbmogiid birra, Jošia beivviid rájes gitta otná beaivvi rádjái. 3 Juda čearda sáhtášii dalle jorgalit bahás geainnustis go gullá makkár oasehisvuođa mun áiggun dahkat dán álbmogii. Dalle mun attán sidjiide ándagassii sin rihkkosiid ja suttuid. 4 Dalle Jeremia rávkkai Baruka, Neria bártni. Baruk čálii girjegerrui Jeremia sánuheami mielde buot maid Hearrá lei sárdnon.
5 De Jeremia dajai Barukii: Mun lean hehttejuvvon inge sáhte mannat Hearrá tempelii. 6 Muhto mana don dohko fástobeaivvi ja loga girjegearus Hearrá sániid maid čállet mu sánuheami mielde, buot olbmuide geat leat Hearrá tempelis ja maiddái buohkaide geat leat boahtán dohko Juda gávpogiin. 7 Sii sáhttet dalle rohkadallat Ipmila vuollegaččat ja jorgalit eret bahás geainnus. Dasgo stuoris lea Hearrá moarri ja suhttu maid son lea sárdnon dán álbmoga vuostá. 8 Baruk, Neria bárdni, dagai nugo profehta Jeremia lei gohččon. Son manai Hearrá tempelii ja logai doppe girjegearus Hearrá sániid. 9 Dat dáhpáhuvai Juda gonagasa Jojakima, Jošia bártni, viđát ráđđenjagi ovccát mánus. Dalle lei fástobeaivi, ja buot Jerusalema ja Juda gávpogiid ássit ledje rávkojuvvon tempelii Hearrá ovdii. 10 Tempelis Baruk logai girjegearus Jeremia sániid oppa álbmogii. Son čuoččui gonagasa čálli Gemarja, Šafana bártni, gámmára ovddas tempela bajit ovdašiljus, Ođđapoartta guoras.
Gonagas boaldá girjegearu
11 Go Mika, Gemarja bárdni, Šafana áddjut, gulai Baruka lohkamin girjegearus Hearrá sániid, 12 de son manai gonagasa šlohttii, čálli gámmárii. Doppe čohkkájedje buot oaivámuččat: Gonagasa čálli Elišama ja Delaja, Šemaja bárdni, Elnatan, Akbora bárdni, Gemarja, Šafana bárdni ja Sidkia, Hananja bárdni, ja eará oaivámuččat. 13 Mika muitalii sidjiide buot maid lei gullan Baruka lohkamin girjegearus oppa álbmogii.
14 Dalle oaivámuččat vuolggahedje Baruka lusa Jehudi, Netanja bártni, gean áddjá lei Šelemja, Kuši bárdni. Jehudi dajai Barukii: “Váldde girjegearu maid lohket álbmogii, ja boađe mu mielde!” Baruk, Neria bárdni, válddii girjegearu ja manai oaivámuččaid lusa. 15 Sii dadje sutnje: “Čohkán ja loga mii girjegerrui lea čállojuvvon!” Baruk logai, ja sii guldaledje. 16 Go sii ledje gullan buot, de sii gehčče suorganemiin guhtet guoibmáseaset ja dadje Barukii: “Mii fertet dieđihit dán gonagassii!” 17 Sii jerre Barukis: “Mo don čállet buot dáid sániid? Sánuhiigo muhtin daid dutnje?” 18 Baruk vástidii: “Jeremia sánuhii daid munnje, ja mun čállen sániid dađistaga bleahkain dán gerrui.” 19 De oaivámuččat dadje Barukii: “Manni čiehkádit, don ja Jeremia, nu ahte ii oktage dieđe gos doai leahppi!” 20 De sii guđđe girjegearu gonagasa čálli Elišama gámmárii ja manne gonagasa šloahta ovdašilljui. De sii muitaledje gonagassii buot mii girjegerrui lei čállojuvvon.
21 Gonagas vuolggahii Jehudi viežžat girjegearu, ja son vieččai dan gonagasa čálli Elišama gámmáris. Dasto Jehudi logai dan gonagassii buot oaivámuččaid gullut geat ledje das. 22 Gonagas ásai dalle dálveviesus, danin go lei ovccát mánnu, ja dolla lei buollimin hillalihtis su ovddas. 23 Juohke háve go Jehudi lei lohkan golbma dahje njeallje spáltta, de gonagas čuohpastii daid eret čálliniibbiin ja bálkestii dollii, dassážii go oppa girjegearru lei buollán. 24 Muhto ii gonagas eaige su bálvvát geat gulle buot dáid sániid, suorganan eaige gaikkodan biktasiid. 25 Ja vaikko Elnatan, Delaja ja Gemarja ánuhedje ahte gonagas ii boalddáše girjegearu, de son ii guldalan sin. 26 Dasto gonagas gohčui bártnis Jerahmeela ja Seraja, Asriela bártni, ja Šelemja, Abdeela bártni, váldit gitta čálli Baruka ja profehta Jeremia. Muhto Hearrá lei čiehkan sudno.
Ođđa girjegearru
27 Maŋŋil go gonagas lei boaldán girjegearu maid Baruk lei čállán Jeremia sánuheami mielde, de bođii Jeremiai dát Hearrá sátni: 28 Váldde nuppi gearu ja čále dasa buot sániid mat ledje ovddit gearus, das maid Juda gonagas Jojakim bolddii. 29 Daja Juda gonagas Jojakimii: Ná cealká Hearrá: Don boldet ovddit girjegearu ja dadjet Jeremiai: “Manne leat čállán ahte Babylona gonagas boahtá deike, duššada dán eatnama ja heavaha das olbmuid ja elliid?” 30 Danne cealká Hearrá Juda gonagas Jojakima birra: Sus ii báze oktage gii čohkkášii Davida truvnnus. Su rumaš suhppejuvvo olggos ja dat njaŋgá doppe beaivvi báhkas ja ija buollašis. 31 Mun ráŋggáštan su, su náli ja buot su bálvaleddjiid sin vearredaguid dihte. Mun divttán boahtit sin ja maiddái Jerusalema ássiid badjelii buot dan oasehisvuođa mainna lean áitán sin, muhto man sii eai jáhkkán boahtit.
32 Nu Jeremia válddii ođđa girjegearu ja attii dan čálli Barukii, Neria bárdnái. Baruk čálii dasa Jeremia sánuheami mielde buot sániid mat ledje dan girjegearus maid Juda gonagas Jojakim lei boaldán. Girjegerrui čállojuvvojedje vel ollu eará seammasullasaš sánit.