Hearrá duššada filistalaččaid
1 Dát lea Hearrá sátni maid profehta Jeremia gulahii filistalaččaid birra, ovdal go farao lei časkán Gaza:
2 Ná cealká Hearrá:
Čázit badjánit davvin
ja šaddet dulveeatnun;
dat gokčet eatnama ja buot mii das lea,
gávpogiid ja daid ássiid.
Olbmot bárgot,
buot eatnama ássit luibmet.
3 Jo gullo oriid gazzadeapma,
vovnnaid ruohča, juvllaid jupma.
Áhčit eai gájo mánáideaset,
sin gieđat leat njuorran.
4 Boahtán lea beaivi
mii duššada buot filistalaččaid.
Ii báze oktage veahkehit Tyrosa ja Sidona.
Hearrá duššada filistalaččaid,
maŋimušaidge dain
geat bohte Kaftora gáttiin.
5 Gaza ráhke oaivvis báljisin,
Aškelon jávohuvvá.
Dii anaklaččaid bázahas,
man guhká dii áigubehtet nájadit?
6 Vuoi, Hearrá miehkki,
itgo juo heaitte?
Máhca dohppasat,
mášuiduva ja oro lotka!
7 Mo dat sáhttá mášuiduvvat go
Hearrá lea dan gohččon?
Miehkki galgá časkit
Aškelona ja mearragátti.