Elifas sárdnu nuppe háve
1 De temanlaš Elifas sárdnugođii fas. Son dajai:
2 Vástidivččiigo viissis
duššiid sárdnumiin,
deavddášiigo son geahppáidis
nuortabiekkain?
3 Válddášiigo son iežas bealuštussan
ávkkehis sárdnuma,
ságaid main ii leat gávdni masage?
4 Don dagat duššin ipmilbalu,
don billistat duođalašvuođa
Ipmila muođuid ovddas.
5 Du suddu coggá
sániid du njálbmái,
don leat válljen alccesat gávviliid giela.
6 Du iežat njálbmi dubme du, in mun,
du iežat baksamat duođaštit du vuostá.
7 Riegáditgo don vuosttamužžan
buot olbmuin,
šaddetgo don ovdal go várit?
8 Ledjetgo don guldaleamen
go Ipmil doalai ráđđádallamiid,
doppego don rábidit alccesat
buot viisodaga?
9 Dieđátgo don juoidá maid
mii eat dieđe,
ipmirdatgo juoidá maid mii eat ipmir?
10 Min gaskkasge leat vuorrasat
ja čurgesvuovttagat,
boarráseappot go du áhčči.
11 Leago dutnje ilá uhccán Ipmila jeđđehus,
sátni mii sárdnojuvvui dutnje láđđásit?
12 Manne don leat nu viimmáskan,
manne russot du čalmmit?
13 Manne don jorgalat moarát
Ipmila vuostá,
manne válddát njálbmái garra sániid?
14 Mo olmmoš sáhttá
leat buhtis? Sáhttágo oktage
gii lea riegádan nissonis
leat vuoigadis Ipmila vuostá?
15 Iihan Ipmil luohte oppa basiidasasge,
ii albmige leat buhtis su čalmmiin!
16 Mo dasto gealbbohis
ja billašuvvan olmmoš
gii juhká vearrivuođa nugo čázi?
17 Mun sártnun dutnje, guldal mu!
Mun dieđihan dutnje maid ieš lean oaidnán,
18 maid lean oahppan viissis olbmáin.
Sii eai čiehkan áhčiideaset dieđu.
19 Aivve sidjiide eanan addojuvvui,
amas olbmot eai ássan sin gaskkas.
20 Ipmilmeahttun eallá balus
buot beivviidis,
veahkaválddálaš ballá buot jagiid
mat sutnje leat udnojuvvon.
21 Son gullá čađat hirpmus jienaid,
ja go son atná iežas oadjebassan,
de rievvár boahtá.
22 Sus ii leat doaivu vealtat seavdnjadasas,
son lea mearriduvvon gahččat miehkkái.
23 Son čádjádallá go ohcá biepmu,
muhto ii son gávnna.
Son diehtá ahte seavdnjatvuođa beaivi
vuordá su.
24 Heahti ja áŧestus balddiha su,
dat falleha su dego soahtalas gonagas.
25 Son bajidii gieđa Ipmila vuostá!
Son goarggastattai Buotveagalačča vuostá,
26 fallehii su ceakkoniskkiid
assás gávdegalbbas suojis.
27 Su muođut duorššagedje,
son buoidudii alimiiddis.
28 Son ásai billašuvvan gávpogiidda,
viesuide main ii oktage ožžon ássat,
mat ledje mearriduvvon
šaddat čievračopman.
29 Son ii šatta rikkisin,
su opmodat ii biso,
su gordneoaivvit eai soja eatnamii.
30 Son ii vealtta seavdnjadasas.
Son lea vesá maid dolla boaldá,
ja biegga doalvu su liđiid.
31 Allos son dorvvastehko duššálašvuhtii!
Dalle son beahttá ieš iežas,
ja duššálašvuohta šaddá su bálkán.
32 Son goldná ovdal áiggi,
su oavssit eai runit goassege.
33 Son lea dego viidnemuorra
mii gahčaha láttakeahtes murjjiidis,
nugo oliivamuorra mii láhppá liđiidis.
34 Šattoheapme lea
ipmilmeahttumiid joavku,
dolla boaldá daid gođiid
geat váldet duolgguid.
35 Sii sahkanahttet lihkuhisvuođa
ja riegádahttet bahávuođa,
sin goaŧus šaddá dušše beahtus.