Job garuha riegádeamis
1 Viimmat Job sárdnugođii. Son garuhii riegádeamis beaivvi 2 ja dajai:
3 Vare duššašii dat beaivi
go mun riegádin,
dat idja go daddjojuvvui: “Bártnáš!”
4 Vare dat beaivi šattašii seavdnjadassan,
allos Ipmil allagasas jerro dan
allosge čuovga báito dasa.
5 Vare mosku ja seavdnjadas
gáibidivččii dan ruoktot,
vare balvvat govččašedje
ja sevnnjodeapmi suorggahivččii dan.
6 Vare seavdnjadeamos seavdnjatvuohta
njielašii dan ija,
allos dat lohkkojuvvojehko
jagi beivviid lohkui,
biehttalehkoset buot mánut das saji.
7 Vare dat idja šattašii šattoheapmin,
allos das gullojehko ávvudeapmi.
8 Vare dan beaivvi garuhivčče
lihkohisvuođa beivviid mánideaddjit,
dat geat máhttet
mánidit ovdan Leviatana.
9 Vare dan iđitnásttit sevnnjodivčče,
vurdos dat čuovgga duššás,
allos dat oidno iđedisroađi
rahpamin čalmmiid,
10 danin go dat ii dahppan
eatniheakka uvssaid mu ovddas
iige čiehkan mu čalmmiin váivvi.
11 Manne mun in jápmán
juo dalle go riegádin,
dalle go bohten eadnán goaŧus?
12 Manne lei aski mii válddii mu vuostá,
manne čiččit maid ožžon njammat?
13 Mun livččen dál
veallámin mášus ja oađđimin ráfis
14 gonagasaiguin ja stuorráiguin,
daiguin geat huksejedje gávpogiid
mat dál leat čievračopman.
15 Mun livččen vuoiŋŋadeamen
oaivámuččaiguin,
daiguin geain lei golli,
geat devde viesuideaset silbbain.
16 Manin mun in riegádan
ovdaláigásaš ohkin
ja roggojuvvon eatnamii,
dego mánná mii ii goassege
oaidnán beaivečuovgga?
17 Doppe eai šat šláma
ipmilmeahttumat,
doppe vuoiŋŋadit dat
geat leat massán fámuset.
18 Doppe fáŋggain lea máššu,
eai sii šat gula fálddiid jiena.
19 Doppe leat smávvát ja stuorrát,
doppe šlávva lea friddja isidisttis.
20 Manin gillájeddjiide
addojuvvo čuovga,
manin eallin dorvvuhemiide,
21 daidda geat duššás vurdet jápmima
ja ohcet dan eambbo
go čihkkojuvvon dávviriid,
22 daidda geat illudivčče sakka
ja ávvudivčče, jos gávnnašedje hávddi?
23 Manne eallá olmmái
gean geaidnu lea láhppon,
gean bálgáid Ipmil lea dahppan?
24 Šuohkáhusat leat šaddan
mu beaivválaš láibin,
mu váidalusat golget boršu čáhcin.
25 Mu deaividii dat mas mun ballen,
dat mas mun soigen, lea joksan mu.
26 Ii leat mus ráfi, ii máššu
iige vuoiŋŋadus,
dušše váivi ja giksi.