Leago du giehta Ipmila giehta?
1 Hearrá vástidii Jobii ramadaga siste:
2 Boahkánastte alimiid, leage olmmái!
Dál mun jearan, ja don vástidat.
3 Dagatgo don duššin
mu vuoiggalašvuođa,
sivahatgo mu áššálažžan
vai ieš beasat leat vuoigadis?
4 Leago du giehta nugo Ipmila giehta,
jupmágo du jietna su jiena láhkái?
5 Čiŋat dalle allatvuođain
ja stuorisvuođain,
gárvot gudni ja hearvásvuođa!
6 Divtte iežat moari govdat,
geahčas goargadiidda ja cuvke sin!
7 Sojat goarggastalliid geahčastagainat,
duolmma ipmilmeahttumiid eatnamii!
8 Govčča sin buohkaid muldii,
čiega sin seavdnjadassii!
9 Dalle munge rámidan du,
du iežat gieđa fápmuhan
lea máhttán veahkehit du.
10 Oainnátgo Behemota?
Mun lean sivdnidan dan,
nugo mun lean sivdnidan duge.
Dat guohtu rási dego vuoksá.
11 Geahča dan alimiid fámu
ja dan čoavjedehkiid givrodaga!
12 Dan seaibi lea starggas
dego sedermuorra,
dan čoarbbeliid suonat
leat čavgadit bárgiduvvon.
13 Dan dávttit leat dego bronsabohccit,
dan dákteriggi nugo ruovdestákkut.
14 Dat lea ovddimuš Ipmila sivdnádusain,
sivdnideaddji lea addán dasa miehki.
15 Várit šaddadit dasa biepmu,
buot meahcispiret duhkoraddet dan lahka.
16 Dat vuoiŋŋada lotusmuoraid vuolde,
hoaššaid gaskkas, suonju čiegás.
17 Lotusmuorat fállet dasa suoivana,
gátti sieđggat čihket dan.
18 Dat ii ballá vaikko johka mo dulvvaš,
dat lea oadjebas vaikko vel Jordan šávašii
dan njálmmi njeaiga.
19 Gii duostá fallehit dan dan oaidnut
ja geassit bátti dan njunneráiggiid čađa?
20 Sáhtátgo bivdit Leviatana vuokkain,
máhtátgo bidjat dasa njálbmeruvddiid?
21 Bijatgo bessodaga dan njunnái,
čuggetgo roahki dan olloliid čađa?
22 Átnugo dat dus árpmu,
sárdnugo dat dutnje litnásit?
23 Dahkágo dat duinna lihtu,
válddátgo dan šlávvan agibeaivái?
24 Duhkorattatgo don dainna dego lottiin,
divttátgo iežat nieiddažiid
láidet dan báttis?
25 Vuovdalitgo bivdosearvvi olbmát dan,
jođihitgo gávpeolbmát dan ruvjjiid?
26 Sáhtátgo čuoggut
dievva sáittiid dan náhkkái
ja čugget árena dan oaivái?
27 Geahččalmat fallehit dan!
Dan soađi it vajáldahte
itge dáhto dahkat dan nuppádis.
28 Muđui gal beahtahalat,
juo dan oaidnimisge
olmmoš gahččá eatnamii.