Vuoigŋa golggahuvvo
1 Boahtá áigi goas
mun golggahan Vuoigŋan
buot olbmuid badjelii.
Din bártnit ja nieiddat
profehtastallet,
din vuorrasat niegadit nieguid,
din nuorra olbmát oidnet
oainnáhusaid.
2 Velá šlávaid
ja šlávvanissoniid badjeliige
mun golggahan
dalle Vuoigŋan.
3 Almmis ja eatnamis
mun oainnihan
ovddolaš mearkkaid:
vara ja dola ja suovvabácciid.
4 Beaivváš nuppástuvvá
seavdnjadassan
ja mánnu varran
ovdal go boahtá Hearrá beaivi,
stuoris ja hirbmatlaš.
5 Muhto juohkehaš gii čuorvu
Hearrá nama, gáddjojuvvo.
Sionváris ja Jerusalemis
lea olmmošjoavku mii
lea beassan báhtui,
nugo Hearrá lea cealkán.
Dat geaid Hearrá rávká,
gáddjojuvvojit.
Hearrá dubme álbmogiid
6 Dan áigge ja daid beivviid
go mun jorgalan
Juda ja Jerusalema oasi,
7 de mun čohkken buot álbmogiid
ja doalvvun sin vuolás
Jošafata leahkái.
Doppe mun dubmen daid dan dihte
maid dat leat dahkan Israelii,
mu álbmogii ja opmodahkii
maid dat biđgejedje
álbmogiid gaskii.
Sii leat juogadan mu eatnama
8 ja vuorbádan mu álbmoga.
Sii leat addán fuorrábálkán bártni,
oastán nieiddain viinni
maid leat juhkan.
9 Ja dál, Tyros ja Sidon ja buot Filistea eatnamat, maid dii mus dáhttubehtet? Áigubehtetgo dii mávssahit munnje juoidá, vai áigubehtetgo dii dahkat munnje juoidá? Hoahpus mun jorgalan din iežadet oaivái dan maid dii dahkabehtet. 10 Dii lehpet váldán mu silbba ja golli ja dolvon mu divraseamos dávviriid iežadet tempeliidda. 11 Dii lehpet vuovdán greikalaččaide Juda ja Jerusalema olbmuid, vai sii gártet guhkás iežaset eatnamis. 12 Dál mun rávkkan sin vuolgit juohke báikkis gosa dii lehpet vuovdán sin, ja jorgalan daguideattet din iežadet oaivái. 13 Mun divttán Juda olbmuid vuovdit din bártniid ja nieiddaid. Sii vuvdet sin Saba olbmuide, álbmogii mii ássá gáidosis. Hearrá lea sárdnon.
14 Čurvot álbmogiidda:
Vihahehket iežadet soahtái,
rávket soahteolbmáid!
Čoahkkanehkoset soahteolbmát,
vai besset vuolgit!
15 Rávdejuššet ploganiibbiid
miehkkin
ja viidnegárdeniibbiid sáitin!
Heittot dadjos: Mun lean sáŋgár!
16 Bohtet hoahpus!
Čoahkkanehket,
buot guovlluid álbmogat!
Hearrá, vuolggat soahteolbmáidat!
17 Álbmogat ráhkkanit,
dat vulget Jošafata leahkái.
Doppe mun dubmen
buot guovlluid álbmogiid.
18 Dohppejehket sirppe,
danin go šaddu lea láddan,
bohtet duolbmat,
danin go viidnebohčingárri lea dievva.
Bohčingárit golget badjel ravddaid,
nu stuoris lea
álbmogiid bahávuohta.
19 Šlámaideaddji joavkkut
Duopmoleagis!
Hearrá beaivi lea lahka
Duopmoleagis.
20 Beaivváš ja mánnu sevnnjodit,
násttit eai šat báitte.
Juda hearvás boahtteáigi
21 Hearrá čeargu Sionis,
diktá jienas jupmat Jerusalemis,
albmi ja eanan doarggistit.
Muhto Hearrá lea iežas álbmoga dorvu,
Israela mánáid ladni.
22 Dalle dii ipmirdehpet
ahte mun lean Hearrá, din Ipmil,
gii ásan Sionis, bassi váristan.
Jerusalem lea bassi,
vierrásat eai šat beasa dohko.
23 Dan beaivvi váriin goaiku
viidnemuorjemáihli,
dieváin golgá mielki,
buot Juda jogažiin golgá čáhci.
Ája golggiida Hearrá viesus
ja láktada Akasialeagi.
24 Egypta šaddá ávdimin
ja Edom jápma meahccin,
dasgo sii stajidedje Juda olbmuid
ja golggahedje vigihis vara
iežaset eatnamis.
25 Muhto Juda bissu agálaččat,
Jerusalem buolvvas bulvii.
26 Guođášingo mun vašálaččaid
varravealggi ráŋggáškeahttá?
In, mun in guođe
dan ráŋggáškeahttá.
Hearrá ássá Sionis.