Ukraina flaggUkraina trenger bibler – kan du hjelpe?
Én bibel koster kr 71
Gå til forsiden

Josua

13 1 Josua lei dál boaris ja vuorasmuvvan. Hearrá celkkii sutnje: “Don leat hui boaris, muhto lea ain ollu eanan válddekeahttá. 2 Válddekeahttá leat buot filistalaččaid eatnamat ja oppa gešurlaččaid eanan 3 mii álgá Šihoris Egypta nuortalis ja ollá davás Ekronii; dat lohkkojuvvo kanaanlaččaid eanamin, dasto filistalaččaid viđa oaivámučča gávpogat Gaza, Ašdod, Aškelon, Gat ja Ekron ja vel avvilaččaid eanan lullin, 4 oppa kanaanlaččaid eanan mii álgá sidonlaččaid Mearas ja ollá gitta Afeka, amorlaččaid eatnama, rádjái, 5 ja vel geballaččaid eanan ja oppa Libanonvárri nuortan Baal-Gada rájes Hermonvári vuollái ja gitta Lebo-Hamata rádjái. 6 Buot várreeatnama ássiid, Libanona rájes gitta Misrefot Majima rádjái, buot sidonlaččaid, mun ieš áján israellaččaid ovddas, muhto don galggat juogadit sin eatnama israellaččaide opmodahkan, nugo mun lean gohččon du dahkat. 7 Juogat eatnama opmodahkan ovcci čerdii ja Manasse čeardabeallái.”

Jordana nuorttabeale eatnamat

8 Rubena ja Gada čearddat ja Manasse čeardabealle ledje juo váldán opmodahkan daid eatnamiid maid Moses lei daidda addán Jordana don bealde, nuorttabealde. Eanan maid Moses, Hearrá bálvaleaddji, lei addán daidda, 9 olii Aroera rájes Arnonjohkaleagis ja johkaleagi gávpogis miehtá oppa aláža Medebas Dibonii, 10 ja dasa gulle buot gávpogat maid amorlaš Sihon, Hešbona gonagas, lei ráđđen, gitta ammonlaččaid eatnama rádjái. 11 Dasa gulle maiddái Gilead ja gešurlaččaid ja maakatlaččaid guovllut, oppa Hermonvárri ja oppa Bašan gitta Salka rádjái. 12 Bašan lei leamaš gonagas Oga riika; su hálddahusgávpogat ledje Aštarot ja Edrei. Og gulai maŋimuš refalaččaide. Moses lei vuoitán ja duššadan sin ja váldán sin eatnama. 13 Muhto israellaččat eai duššadan gešurlaččaid eaige maakalaččaid, ja sii ásset veláge israellaččaid gaskkas.

14 Dušše Levi čearda ii ožžon opmodaga. Hearrá, Israela Ipmil, lea sin opmodat, nugo son lea sidjiide lohpidan.

15 Moses attii opmodaga Rubena čeardda sogaide. 16 Dat ožžo eatnama Aroera rájes Arnonjohkaleagis ja johkaleagi gávpogis davás ja oppa aláža Medeba rádjái, 17 Hešbona ja buot dasa gullevaš aláža gávpogiid Dibona, Bamot Baala, Bet Baal Meona, 18 Jahsa, Kedemota ja Mefaata, 19 Kirjatajima, Sibma ja Seret Hašahara mii lea leahkeváris, 20 Bet-Peora, Pisga vilttiid ja Bet-Haješimota 21 ja buot eará aláža gávpogiid, oppa riikka mii lei gullan amorlaččaid gonagassii Sihonii gii ráđđii Hešbonis. Moses časkkii su oktanaga midjanlaš ráđđejeddjiiguin Eviin, Rekemiin, Suriin, Huriin ja Rebain geat ledje Sihona oaivámuččat ja ásse su eatnamis. 22 Seammá háve israellaččat godde Bileama, Beora bártni, einnosteaddji. 23 Rubenlaččaid eatnama oarjerádján lei Jordan. Dat lei Rubena čeardda sogaid opmodat, dan gávpogat ja birasbáikkit.

24 Moses attii opmodaga Gada čeardda sogaide. 25 Dasa gulle Jaser, buot Gileada gávpogat ja bealli ammonlaččaid eatnamis gitta Aroera rádjái mii lei Rabba lahka. 26 Daid guovlu olii Hešbonis Ramat-Hammispei ja Betonimii ja Mahanajimis gitta Lo-Debara guovllu rádjái. 27 Jordanleagis sii ožžo Bet Harama, Bet Nimra, Sukkota ja Safona mat ledje Hešbona gonagasa Sihona riikka bázahusat. Daid guovllu oarjerádján lei Jordan Gennesaretjávrri rádjái. 28 Dat lei Gada čeardda sogaid opmodat, dan gávpogat ja birasbáikkit.

29 Moses attii opmodaga Manasse čeardabeale sogaide. 30 Daid eanan álggii Mahanajimis ja dasa gulai oppa Bašan, gonagas Oga ovddeš riika, ja Jaira siiddat Bašanis, oktiibuot guhttalogi gávpoga. 31 Bealli Gileadis ja vel Oga ráđđehusgávpogat Aštarot ja Edrei mat ledje Bašanis, addojuvvojedje Manasse bártni Makira mánáid soga nuppi beallái. 32 Dat ledje Jordana nuorttabeale eatnamat maid Moses juogadii Moaba duolbadasain Jeriko buohta.

33 Muhto Levi čerdii Moses ii addán opmodaga. Sin opmodat lea Hearrá, Israela Ipmil, nugo son lea lohpidan sidjiide.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.