1 Nubbi vuorbi gahčai Simeona čeardda sogaide. Dat ožžo eatnama Juda čeardda eatnama siskkobealde. 2 Sin opmodahkii gulle dát gávpogat: Beer Šeba, Šema, Molada, 3 Hasar-Šual, Bala, Esem, 4 Eltolad, Betul, Horma, 5 Siklag, Bet-Hammarkabot, Hasar-Susa, 6 Bet-Lebaot ja Šaruhen, golbmanuppelohkái gávpoga oktan birasbáikkiideasetguin, 7 ja Ajin, Rimmon, Eter ja Ašan, njeallje gávpoga oktan birasbáikkiideasetguin, 8 ja vel buot báikkit mat ledje daid gávpogiid birra gitta Baalat-Beerii ja Ramatii Negevis. Dat guovlu šattai Simeona čeardda sogaid opmodahkan. 9 Simeona čearda oaččui opmodaga Juda čeardda oasis, danin go Juda čeardda oassi lei stuorit go maid sii dárbbašedje. Danin Simeona čearda oaččui opmodaga Juda eatnama siskkobealde.
10 Goalmmát vuorbi gahčai Sebulona čeardda sogaide. Dat eanan maid sii ožžo opmodahkan, olii gitta Sarida rádjái. 11 Sin rádji manná das oarjjás Maralai ja das Dabbešetii ja dan jogažii mii lea Jokneama luhtte. 12 Saridis nuorttas rádji manná Kislot-Tabora guovllu rádjái ja doppe Daberatii ja ain bajás Jafiai. 13 Doppe rádji manná nuorttas Gat-Heferii ja Et-Kasinii ja das ain Rimmonii ja gávvá de Neai. 14 Das davverádji manná Hannatonii ja boahtá dan leahkái gos lea Jiftah-El. 15 Dasa lassin sebulonlaččaide bohte Kattat, Nahalal, Šimron, Jidala ja Betlehem, guoktenuppelohkái gávpoga oktan birasbáikkiideasetguin. 16 Sebulona čeardda sogat ožžo opmodahkan dan guovllu ja daid gávpogiid oktan birasbáikkiideasetguin.
17 Njealját vuorbi gahčai Isaskara čeardda sogaide. 18 Daid eatnamii gulle Jisreel, Kesulot, Šunem, 19 Hafarajim, Šion, Anaharat, 20 Rabbit, Kišon, Ebes, 21 Remet, En-Gannim, En-Hadda ja Bet-Passes. 22 Rádji manná Taborii, Šahasimii ja Bet-Šemešii ja nohká Jordanii. Dan eatnamii gullet oktiibuot guhttanuppelohkái gávpoga oktan birasbáikkiideasetguin. 23 Isaskara čeardda sogat ožžo opmodahkan dan guovllu ja daid gávpogiid oktan birasbáikkiideasetguin.
24 Viđát vuorbi gahčai Ašera čeardda sogaide. 25 Daid eatnamii gulle Helkat, Hali, Beten, Akšaf, 26 Alammelek, Amad ja Mišal. Rádji manná oarjjás Karmelii ja Šihor Libnatii 27 ja nuorttas Bet-Dagonii, dasto davás Sebulona eatnama rádjái ja dan leahkái gos leat Jiftah-El, Bet-Haemek ja Neiel ja doppe davás Kabulii, 28 Abdonii, Rehobii, Hammonii ja Kanai ja gitta stuorra Sidona rádjái. 29 Nuppi guovllus rádji manná Ramai ja das Tyrosa ladnegávpoga lusa, sodjá Hosai ja das merrii. Eará gávpogat leat Mahaleb, Aksib, 30 Akko, Afek ja Rehob, guoktelogiguokte gávpoga oktan birasbáikkiideasetguin. 31 Ašera čeardda sogat ožžo opmodahkan dan guovllu ja daid gávpogiid oktan birasbáikkiideasetguin.
32 Guđát vuorbi gahčai Naftali čeardda sogaide. 33 Daid rádji manná Helefis, Besaanannima terebintta rájes, Adami Hannekeba ja Jabneela bokte Lakkumii ja das Jordanii. 34 Das rádji manná oarjjás Asnot-Taborii ja doppe Hukokii. Lullin sin eana lea rádjálagaid Sebuloniin, oarjin Ašeriin ja nuortan Jordaniin. 35 Ladnegávpogat ledje Siddim, Ser, Hammat, Rakkat, Kinneret, 36 Adama, Rama, Hasor, 37 Kedeš, Edrei, En-Hasor, 38 Jiron, Migdal-El, Horem, Bet-Anat ja Bet-Šemeš, ovccinuppelohkái gávpoga oktan birasbáikkiideasetguin. 39 Naftali čeardda sogat ožžo opmodahkan dan guovllu ja daid gávpogiid oktan birasbáikkiideasetguin.
40 Čihččet vuorbi gahčai Dana čeardda sogaide. 41 Dan eatnamis maid sii ožžo opmodahkan, ledje dát gávpogat: Sora, Eštaol, Ir-Šemeš, 42 Šaalabbin, Ajalon, Jitla, 43 Elon, Timna, Ekron, 44 Elteke, Gibbeton, Baalat, 45 Jehud, Bene-Berak, Gat-Rimmon, 46 Me-Hajarkon ja vel Jafo birasbáikkit. 47 Muhto sii eai čáhkan Dana čeardda eatnamii. Danin sii vulge soahtat Lešemiin, válde dan ja godde dan ássiid. Sii válde dan opmodahkaneaset, ásse dohko ja navde dan Danin áhčiset mielde. 48 Dana čeardda sogat ožžo opmodahkan dan guovllu ja daid gávpogiid oktan birasbáikkiideasetguin.
49 Go israellaččat ledje geargan juogadeames eatnama osiide, de sii adde das opmodaga Josuai, Nuna bárdnái. 50 Nugo Hearrá lei gohččon, de sii adde sutnje Efraima várreeatnamis Timnat-Seraha, gávpoga maid son ieš siđai. Josua nannii gávpoga muvrrain ja ásai dohko.
51 Dát ledje dat eatnamat maid báhppa Elasar ja Josua, Nuna bárdni, ja Israela čearddaid bearašoaivámuččat vuorbádedje opmodahkan Hearrá muođuid ovddas almmustusgoađi uvssa guoras Šilos. Nu sii gerge juogadeames eatnama.