Ukraina flaggRedder Bibelen liv i Ukraina?
Finn ut mer
Gå til forsiden

Váidaluslávlagat

5

Viđát lávlla

1 Hearrá, muitte mo midjiide

lea geavvan,

geahča mo mii hiddjiduvvot.

2 Min opmodat lea šaddan

vierrásiid gihtii,

min viesut leat gártan

vierroolbmuid oapmin.

3 Mii leat šaddan áhčihis mánnán,

min eatnit leat šaddan leaskan.

4 Mii fertet oastit min iežamet čázi,

mii šaddat máksit min iežamet muoraid.

5 Min vuortnuheddjiid geasis

lea min niskkis,

mii leat váiban, eat beasa vuoiŋŋastit.


6 Mii geigiimet gieđa Egyptii ja Assyriai

vai oččošeimmet láibbi borrat.

7 Min áhčit suddudedje.

Sii eai leat šat eambbo;

mii gillát ráŋggáštusa.

8 Šlávat ráđđejit min,

ii oktage rohtte min sin gieđas.

9 Heakkaváras mii viežžat láibámet,

miehkki áitá meahcis.

10 Min liiki njallá dego láiráomman,

min rumaš buollá nealggis.

11 Vuoitit rihpet nissoniin Sionis,

nuorra nieiddain Juda gávpogiin.

12 Sii harcejit oaivámuččaid,

vuorrasat eai adnojuvvo maninge.

13 Nuorra olbmát fertejit

jorahit millogeđggiid,

bártnážat suoibasaddet

go guddet muorranođiid.

14 Vuorrasat eai čoaggan šat portii,

nuorat eai čuojat šat čuojanasaideaset.

15 Min váimmu illu lea nohkan,

dánsun lea nuppástuvvan morašin.

16 Gudnegierdu lea gahččan min oaivvis.

Vuoi min, mii leat suddudan!

17 Dan dihte min váibmu lea buozas,

dan dihte min čalmmit leat sevnnjodan.

18 Sionvárri lea šaddan ávdimin,

doppe ruohtadit dál riebanat.


19 Hearrá, don ráđđet agálaš áigái,

du truvdnu bissu buolvvas bulvii.

20 Manne don leat vajáldahttán min agás,

guođđán min agálaš áigái?

21 Máhcat min lusat, Hearrá,

de mii máhccat.

Divtte min beivviid šaddat dakkáražžan

go dat ledje dolin.

22 Muhto don leat hilgon min áibbas,

du moarri lea garas.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.