Rivttes oaffarbáiki
1 Hearrá sártnui Mosesii:
2 Cealkke Aronii, su bártniide ja buot israellaččaide: Ná Hearrá lea gohččon:
3 Jos soames israellaš goddá vuovssá, lábbá dahje gáicca siiddas dahje siidda olggobealde 4 iige vuos buvtte dan almmustusgoađi uvssa lusa, vai beassá addit dan oaffarattáldahkan Hearrái su goađi ovddas, de dat lohkkojuvvo sutnje varravealgin. Son lea golggahan vara, ja son galgá jávkaduvvot iežas álbmogis. 5 Dan dihte israellaččat eai šat oaččo njuovvat oaffarelliideaset gos fal olgun, muhto sii galget buktit daid báhppii Hearrá ovdii almmustusgoađi uvssa lusa ja njuovvat daid doppe searvevuođaoaffarin Hearrái. 6 Báhppa galgá riškkuhit vara Hearrá áltára ala almmustusgoađi uvssa guoras. Son galgá boaldit buoiddi hádjan mii lea Hearrá miela mielde. 7 Israellaččat eai oaččo šat oaffaruššat njuovvanoaffariid bohkkávuoiŋŋaide maiguin sii furrošit. Dát lea sidjiide agálaš láhka buolvvas bulvii.
8 Cealkke sidjiide: Jos soames israellaš dahje vieris gii ássá din gaskkas, oaffaruššá boaldinoaffara dahje njuovvanoaffara 9 iige vuos buvtte dan almmustusgoađi uvssa lusa vai beassá addit dan Hearrái, de dat olmmái galgá jávkaduvvot iežas álbmogis.
Varraborrangielddus
10 Jos soames israellaš dahje vieris gii ássá din gaskkas, borrá maidege mas lea varra, de mun jorgalan dan olbmo vuostá ja jávkadan su su álbmogis. 11 Varas lea sivdnádusa heagga. Mun lean mearridan ahte varra galgá buktojuvvot áltára ala soabahussan didjiide alcceseattet. Varra buktá soabahusa, danin go varas lea heagga. 12 Dan dihte mun lean cealkán israellaččaide ahte ii oktage sis oaččo borrat vara. Ii vierisge gii ássá din gaskkas, oaččo borrat vara. 13 Jos soames israellaš dahje vieris gii ássá sin gaskkas goddá bivddus meahccefuođđu dahje lotti maid oažžu borrat, de son galgá golggahit das vara ja gokčat vara muolddain. 14 Dasgo varra lea juohke sivdnádusa heagga. Danin mun lean cealkán israellaččaide ahte sii eai oaččo borrat mange sivdnádusa vara, dasgo juohke sivdnádusa varra lea dan heagga. Juohkehaš gii borrá vara, galgá jávkaduvvot.
15 Jos muhtun, leaččai son dal eatnamis riegádan dahje vieris, borrá ieš jápmán dahje jámas gaikkoduvvon ealli, de son galgá bassat biktasiiddis ja basadit. Son lea buhtismeahttun eahkeda rádjái; de son lea buhtis. 16 Muhto jos son ii basa biktasiiddis iige basat, de son šaddá sivalažžan.