1 Gehččet, dat beaivi boahtá, dat buollá dego omman. Dalle buot čeavlát ja vearredahkkit leat dego oalgačalmmit, ja dat beaivi mii boahtá, cahkkeha sin, cealká Hearrá, Almmiveagaid Ipmil; ii báze ii ruohtas iige oaksi. 2 Muhto didjiide geat ballabehtet mu namas, badjána vanhurskkisvuođa beaivváš dálkkasin su soajáid vuolde. Dii beassabehtet olggos ja njuikkodehpet dego gálbbit. 3 Dan beaivvi maid mun mearridan, dii duolbmabehtet eatnamii ipmilmeahttumiid, ja sii duolbmašuvvet gavjan, cealká Hearrá, Almmiveagaid Ipmil.
Moses ja Elia
4 Muitet bálvaleaddján Mosesa lága maid mun adden sutnje Horebis oppa Israela várás, gohččumiid ja báhkkomiid. 5 Gullet! Ovdal go boahtá Hearrá beaivi, stuoris ja hirbmatlaš, de mun vuolggahan didjiide profehta Elia. 6 Son jorgala áhčiid váimmu mánáid beallái ja mánáid váimmu áhčiid beallái. Dalle mun in vihat eatnama duššadeapmái, go boađán.