Jesusa bajásčuožžileapmi
1 Go sabbat lei vássán, de Maria Magdalena, Jakoba eadni Maria ja Salome oste njálggahájat vuoidasiid, vai besset mannat vuoidat Jesusa. 2 Árrat iđedis vahku vuosttaš beaivvi go beaivváš badjánii, sii vulge hávddi lusa. 3 Sii árvaledje guhtet guimmiideasetguin: “Gii veahkehivččii min ja fierahivččii geađggi hávddi uksaráiggi ovddas?” 4 Muhto de sii oidne ahte geađgi lei fierahuvvon eret; dat lei hui stuorra geađgi. 5 Go sii ledje mannan hávddi sisa, de sii oidne olgeš bealde čohkkámin nuorra olbmá geas ledje gárvun guhkes vilges biktasat. Sii suorganedje. 6 Muhto nuorra olmmái celkkii: “Allet suorgan. Dii ohcabehtet Jesus nasaretlačča gii lei russiinávlejuvvon. Son lea čuožžilan jábmiid luhtte, ii son leat dás. Gehččet, dá lea sadji gosa son biddjojuvvui. 7 Muhto mannet dal muitalit Peterii ja eará máhttájeddjiide: ‘Son manná din ovdal Galileai. Doppe dii beassabehtet oaidnit su, nugo son ieš celkkii didjiide.’” 8 Go nissonat bohte olggos, de sii báhtaredje hávddi luhtte doarggistemiin ja balus. Sii eai muitalan maidege geasage, danne go sii balle.
Jesus almmustuvvá máhttájeddjiidasas
9 Go Jesus iđedis vahku vuosttaš beaivvi lei čuožžilan jábmiid luhtte, de son almmustuvai vuos Maria Magdalenai, geas son lei ádján olggos čieža bahás vuoiŋŋa. 10 Maria vulggii das ja muitalii dan daidda geat ledje leamaš Jesusiin ja dál moraštedje ja čirro. 11 Muhto sii eai jáhkkán, go sii gulle ahte Jesus lei eallimin ja ahte Maria lei oaidnán su. 12 Das maŋŋil Jesus almmustuvai eará hámis guoktásii sis, go soai leigga mannamin eret gávpogis. 13 Maiddái dát guovttos manaiga muitalit earáide, muhto sii eai jáhkkán sudnuidege.
14 Maŋimustá Jesus almmustuvai oktanuppelohkái máhttájeaddjásis go sii ledje boradeamen. Son cuiggodii sin eahpeoskku ja váimmu garasvuođa, go sii eai lean jáhkkán daidda geat ledje oaidnán ahte son lei bajásčuožžilan.
15 Son celkkii sidjiide: “Mannet oppa máilbmái ja sárdnidehket evangeliuma buohkaide oppa sivdnádussii. 16 Dat gii dasa osku ja gásttašuvvo, bestojuvvo. Gii ii oskko, dat dubmejuvvo. 17 Dáid geat oskot, čuvvot dát mearkkat: Mu nammii sii ádjet olggos bahás vuoiŋŋaid, sárdnot ođđa gillii, 18 dohppejit gieđain gearbmašiid, ja jos sii juhket goddi mirkko, de dat ii sin vahágahte. Sii bidjet gieđaid buhcciid ala, ja dat dearvvašmuvvet.”
Jesus váldojuvvo albmái
19 Go Hearrá Jesus lei sárdnon sidjiide dán, de son váldojuvvui bajás albmái ja son čohkánii Ipmila olgeš beallái. 20 Máhttájeaddjit vulge ja sárdnidedje buot guovlluin. Hearrá lei singuin ja duođaštii sáni mearkkaiguin.