Bosttahuvvon olmmái
1 Sii bohte Gerasa eatnamii nuppi beallái jávrri. 2 Dalán go Jesus lávkii fatnasis, de su ovddal bođii hávddiin olmmái geas lei buhtismeahttun vuoigŋa. 3 Olmmái orui hávddiin, iige oktage nagodan šat čatnat su, ii velá láhkkiiguinge. 4 Máŋgii su gieđat ja juolggit ledje čadnojuvvon, muhto son lei cuvken láhkkiid ja botken báttiid. Ii oktage máhttán lodjudit su. 5 Ijatbeaivái son orui hávddiin ja váriin, huikkii ja nájai iežas geđggiiguin.
6 Go son dal áiccai Jesusa guhkkin, de son bođii viega, luoitádii su ovdii 7 ja čuorvvui alla jienain: “Jesus, Alimus Ipmila Bárdni, mii dus lea muinna dahkamuššan? Mun vuortnuhan du Ipmila bokte, ale givssit mu!” 8 Dasgo Jesus lei cealkán sutnje: “Don buhtismeahttun vuoigŋa, vuolgge olbmás!” 9 “Mii du namma lea?” Jesus jearai, ja oaččui vástádussan: “Legiona, danne go mii leat eatnagat.” 10 Vuoiŋŋat ánuhedje ahte Jesus ii ájáše sin eret dan guovllus. 11 Das lahkosiin lei várrevielttis guohtumin stuorra spiidneeallu. 12 Buhtismeahttun vuoiŋŋat ánuhedje Jesusis: “Vuolggat min spiidneellui, divtte min mannat spiinniide!” 13 Jesus mieđihii dan daidda. Dalle buhtismeahttun vuoiŋŋat vulge olbmás ja manne spiinniide, ja oppa eallu, sullii guokteduhát spiinni, hurgalii báktedardda badjel vuolás jávrái, ja buot spiinnit heavvanedje.
14 Guođoheaddjit viehkaledje doppe ja muitaledje dán visot gávpogis ja lagas báikkiin. Olbmot bohte geahččat mii lei dáhpáhuvvan. 15 Sii bohte Jesusa lusa ja oidne bosttahuvvon olbmá čohkkámin das. Olmmái geas ledje leamaš buot dat vuoiŋŋat, čohkkái gárvvuhuvvon ja olles jierpmis. Dat suorggahii sin. 16 Dat geat ledje oaidnán visot, muitaledje mo lei geavvan bosttahuvvon olbmái ja spiinniide. 17 Dalle buohkat ánuhišgohte Jesusa vuolgit eret sin eatnamis.
18 Go Jesus manai fatnasii, de dat gii lei leamaš bosttahuvvon, siđai beassat su fárrui. 19 Jesus ii suovvan dan, muhto celkkii sutnje: “Mana ruoktot iežat olbmuid lusa ja muital sidjiide buot maid Hearrá lea dahkan dutnje, ja mo son lea árpmihan du.” 20 Olmmái vulggii ja muitalii Dekapolisa guovllus buohkaide maid Jesus lei dahkan sutnje, ja buohkat ovddošedje.
Jairosa nieida ja nisson gii guoskkahii Jesusa biktasiid
21 Go Jesus lei fas mannan fatnasiin jávrri nuppe beallái, de ollu olbmot čoahkkanedje su lusa. Go son lei ain jávregáttis, 22 de dasa bođii muhtin synagoga ovdaolmmoš gean namma lei Jairos. Go olmmái oinnii Jesusa, de son luoitádii su julggiid ovdii 23 ja ánuhii: “Boađe, mu uhca nieiddaš lea jápmimin. Bija gieđaid su ala, de son dearvvašmuvvá iige jáme.” 24 Jesus vulggii su mielde, ja ollu olbmot čuvvo su ja bahkkejedje sutnje.
25 Das lei maid nisson gii lei gillán vardima guoktenuppelohkái jagi. 26 Son lei leamaš máŋgga dálkkasteaddji divššus ja lei gillán olu. Son lei golahan buot mii sus lei, iige lean ožžon maidege vehkiid, muhto lei baicca hedjonan. 27 Son lei gullan mii muitaluvvui Jesusa birra, ja dál son bođii olbmuid gaskka Jesusa duohkái ja guoskkahii su biktasiid maŋil, 28 dasgo son jurddašii: “Jos beasašin guoskkahit su biktasiid, de mun dearvvašmuvan.” 29 Dallánaga vardin bisánii, ja son dovddai rupmašis ahte lei buorránan givssistis. 30 Jesus dovddai dalán ahte sus lei vuolgán fápmu. Son jorggihii olbmuid siste ja jearai: “Gii guoskkahii mu biktasiid?” 31 Máhttájeaddjit dadje sutnje: “Don oainnát ahte olbmot bahkkejit du ala, ja jearat: Gii guoskkahii mu?” 32 Muhto Jesus geahčai iežas birra vai beassá oaidnit gii dan lei dahkan. 33 Nisson doarggistii balus, danin go son diđii mii lei dáhpáhuvvan sutnje. Son bođii Jesusa ovdii, luoitádii eatnamii ja muitalii buot mii lei dáhpáhuvvan. 34 Jesus celkkii sutnje: “Nieiddažan, du osku lea buoridan du. Mana ráfis, don leat buorránan givssistat.”
35 Go Jesus lei ain sárdnumin, de muhtumat synagoga ovdaolbmo ruovttus bohte ja dadje: “Du nieida jámii. Ale šat vuorjja oahpaheaddji.” 36 Go Jesus gulai sin sániid, de son celkkii synagoga ovdaolbmui: “Ale bala, duššefal oskko.” 37 Son ii suovvan ovttage boahtit mielde earret Petera, Jakoba ja Johannesa, Jakoba vielja. 38 Sii bohte synagoga ovdaolbmo vissui, ja Jesus oinnii šláma ja olbmuid geat čirro ja fuiko. 39 Son manai sisa ja celkkii sidjiide: “Manne dii šlápmabehtet ja čierrubehtet? Ii mánná leat jápmán, son oađđá.” 40 Olbmot boagustedje su. Muhto son ájii buohkaid olggos, válddii mielddis máná áhči ja eatni ja daid geat ledje suinna, ja manai latnjii gos mánná lei. 41 De son válddii máná gihtii ja celkkii: “Talita kum!” Dat mearkkaša: “Nieida, mun cealkkán dutnje: Lihka!” 42 Ja dallánaga nieida čuožžilii ja váccašii; son lei guoktenuppelotjahkásaš. Buohkat hirpmástuvve sakka. 43 Muhto Jesus gilddii sin garrasit muitaleames geasage mii lei dáhpáhuvvan. Son gohčui sin addit niidii borrat.