Ipmila báhkkomat ja olbmuid njuolggadusat
1 Muhtun čáloahppavaččat bohte Jerusalemis, ja ovttas farisealaččaiguin sii manne Jesusa lusa. 2 Sii oidne muhtumiid su máhttájeddjiin borramin buhtismeahttun, basakeahtes gieđaiguin. 3 Eai farisealaččat eaige eará juvddálaččatge boradišgoađe ovdal go leat bassan gieđaid. Nu sii atnet dárkilit áhčiid árbevieruid. 4 Ja go sii leat boahtán márkanšiljus, de sii eai bora maidege ovdal go leat lávggodan. Sis leat maiddái ollu eará vierut maid sii leat dollet, nugo doidit juhkanlihtiid, mukkaid ja ruittuid. 5 Danne farisealaččat ja čáloahppavaččat jerre Jesusis: “Manne du máhttájeaddjit eai doala áhčiid árbevieruid, muhto borret buhtismeahttun gieđaiguin?” 6 Jesus vástidii sidjiide: “Dii guoktilaččat! Riekta Jesaja lea einnostan din birra. Leahan čállojuvvon: Dát álbmot gudnejahttá mu baksamiiguin, muhto dan váibmu lea guhkkin mus eret. 7 Duššás sii bálvalit mu, dasgo sin oahput leat olbmuid báhkkomat. 8 Dii lehpet hilgon Ipmila báhkkoma, vai sáhttibehtet doallat olbmuid njuolggadusaid.” 9 Ja son celkkii: “Dii lehpet čeahpit dahkat duššin Ipmila báhkkoma, vai beassabehtet atnit iežadet njuolggadusaid. 10 Moses celkkii: Gudnejahte áhčát ja eatnát ja Gii garuha áhčis dahje eatnis, dat galgá ráŋggáštuvvot jápmimiin. 11 Muhto dii oahpahehpet nuppe ládje. Jos muhtun dadjá áhččásis dahje eadnásis: ‘Dat mainna mun livččen sáhttán veahkehit du, lea dál korban: mun lean lohpidan dan tempelattáldahkan’, 12 de dii ehpet suova su veahkehit iežas áhči dahje eatni. 13 Nu dii dahkabehtet duššin Ipmila sáni, go doallabehtet árbenjuolggadusaideattet ja oahpahehpet daid. Ja eatnat eará dakkár daguid dii dahkabehtet.”
14 Son rávkkai fas olbmuid lusas ja celkkii: “Guldalehket buohkat mu ja geahččalehket áddet. 15 Ii mihkkege mii boahtá olbmo sisa olggobealde, daga su buhtismeahttumin. Muhto dat mii manná olbmos olggos, dahká olbmo buhtismeahttumin.” 16 Gullos dat geas leat bealjit!
17 Go Jesus dasto vulggii olbmuid luhtte ja bođii vissui, de máhttájeaddjit sihte su čilget dán veardádusa. 18 Son celkkii sidjiide: “Lehpetgo diigis nie jierpmeheamit? Ehpetgo dii ádde ahte ii mihkkege mii boahtá olbmo sisa olggobealde, sáhte dahkat su buhtismeahttumin? 19 Iihan dat mana su váibmui, muhto čoavjái ja dasto lunddolaš geainnu olggos.” Nu son celkkii ahte buot biepmut leat buhttásat. 20 Son celkkii vel: “Mii olbmos boahtá olggos, dat dahká su buhtismeahttumin. 21 Aiddo olbmo siskkildasas, váimmus, bohtet bahás jurdagat, furrodat, suolavuohta, olmmošgoddin, 22 váccešis eallin, vuovdáivuohta, bahávuohta, behtolašvuohta, nuoskivuohta, utnohisvuohta, hiddjideapmi, čeavláivuohta ja jierpmehisvuohta. 23 Buot dát bahá boahtá olbmo siskkildasas ja dahká su buhtismeahttumin.”
Kanaanlaš nissona osku
24 Jesus vulggii doppe Tyrosa guovlluide. Son manai orrut muhtun dállui iige dáhtton ovttage dan diehtit, muhto su boahtin ii lean čiegadeames. 25 Muhtun nisson gean nieiddas lei buhtismeahttun vuoigŋa, gulai ahte Jesus lei boahtán, ja son bođii ja luoitádii Jesusa julggiid ovdii. 26 Nisson ii lean juvddálaš, muhto Syria foinikialaš. Son siđai Jesusa ádjit bahás vuoiŋŋa su nieiddas, 27 muhto Jesus celkkii: “Divtte mánáid vuos gallánit. Ii leat riekta váldit láibbi mánáin ja bálkestit dan beatnagiidda.” 28 Nisson vástidii: “Hearrá, maiddái beatnagat ožžot borrat beavddi vuolde láibemoaluid maid mánát gahčahit.” 29 Dalle Jesus celkkii sutnje: “Daid sániid dihte mun cealkkán dutnje: Mana ruoktot, bahás vuoigŋa lea vuolgán du nieiddas.” 30 Nisson manai ruoktot ja oinnii máná veallámin seaŋggas. Bahás vuoigŋa lei vuolgán sus.
Jesus buorida bealjehis olbmá
31 Dasto Jesus vulggii fas Tyrosa guovlluin ja bođii Sidona bokte Galileajávrái, Dekapolisa guovlluide. 32 Doppe su lusa buktojuvvui bealjehis olmmái gii illá máhtii sárdnut, ja sii dáhtto su bidjat gieđa olbmá ala. 33 Jesus válddii olbmá sierra olbmuid gaskkas, bijai suorpmaid su beljiide, čolgadii ja guoskkahii su njuokčama. 34 De son geahčastii albmái, šuohkihii ja celkkii sutnje: “Effata.” Dat lea: “Rahpas.” 35 Dallánaga olbmá bealjit rahpasedje, ja su njuokčama báddi čoavdásii, nu ahte son sártnui čielgasit. 36 Jesus gilddii olbmuid muitaleames dán geasage, muhto mađe eambbo son sin gilddii, dađe eambbo sii beakkuhedje dan. 37 Buohkat ovddošedje sakka ja dadje: “Buot son lea dahkan bures. Bealjehemiid son dahká gullin ja gielahemiid sárdnun.”