Báhpaid ja levilaččaid sogat
1 Dát leat dat báhpat ja levilaččat geat bohte ruovttoluotta oktan Serubbabeliin, Šealtiela bártniin, ja Ješuain:
Seraja, Jeremia, Esra, 2 Amarja, Malluk, Hattuš, 3 Šekanja, Rehum, Meremot, 4 Iddo, Ginneton, Abia, 5 Mijamin, Maadja, Bilga, 6 Šemaja, Jojarib, Jedaja, 7 Sallu, Amok, Hilkia ja Jedaja. Sii ledje báhpaid ja sin virgeguimmiid oaivámuččat Ješua áigge.
8 Levilaččat: Ješua, Binnui, Kadmiel, Šerebja, Juda ja Mattanja, gii ovttas virgeguimmiidisguin jođihii máidnunlávluma, 9 ja Bakbukja ja Unni, geat ovttas virgeguimmiideaskkaguin čuoččuiga nubbin joavkun aiddo sin buohta.
10 Ješuai riegádii Jojakim, Jojakimii Eljašib, Eljašibii Jojada, 11 Jojadai Johanan ja Johananii Jaddua.
12 Jojakima áigge dát olbmát ledje báhppasogaid oaivámuččat: Meraja lei Seraja soga oaivámuš, Hananja Jeremia soga, 13 Mešullam Esra soga, Johanan Amarja soga, 14 Jonatan Malluka soga, Josef Šebanja soga, 15 Adna Harima soga, Helkai Merajota soga, 16 Sakarja Iddo soga, Mešullam Ginnetona soga, 17 Sikri Abia soga, Minjamina soga, Piltai Moadja soga, 18 Šammua Bilga soga, Jonatan Šemaja soga, 19 Mattenai Jojariba soga, Ussi Jedaja soga, 20 Kallai Sallu soga, Eber Amoka soga, 21 Hašabja Hilkia soga ja Netanel Jedaja soga oaivámuš.
22 Eljašiba, Jojada, Johanana ja Jaddua áigge báhppasogaid oaivámuččat čállojuvvojedje girjái Persia gonagasa Dareiosa ráđđenáiggi rádjái. 23 Levilaččaid sogaid oaivámuččat čállojuvvojedje muitalusaid girjjiide Johanana, Eljašiba bártni, áiggi rádjái.
24 Levilaččaid oaivámuččat ledje Hašabja, Šerebja, Ješua, Binnui ja Kadmiel. Sin virgeguoimmit čužžo aiddo sin buohta vuoruideaset mielde. Sii giite ja rámidedje Ipmila, nugo Ipmila olmmái David lei mearridan. 25 Mattanja, Bakbukja, Obadja, Mešullam, Talmon ja Akkub ledje uksafávttat geaid bargun lei fáktet poarttaid vuorkálanjaid. 26 Sii ledje Jojakima, Ješua bártni, Josadaka áddjuba, ja eatnanhearrá Nehemja ja Esra, čáloahppavačča, áigásaš olbmot.
Jerusalema gávpotmuvra vihahuvvo
27 Go šattai áigi vihahit Jerusalema muvrra, de Jerusalemii vižžojuvvojedje levilaččat buot báikkiin gos sii ásse, lágidit vihahanávvudeami, máidnut ja čuojahit symbálaid, hárppaid ja lyraid. 28 Lávlut čoagganedje Jerusalema birasguovlluin ja netofalaččaid giliin, 29 Bet-Haggilgalis ja dain eatnamiin mat leat Geba ja Asmaveta birra. Lávlut ledje oainnat huksen alcceseaset giliid Jerusalema lahka. 30 Báhpat ja levilaččat buhtistedje iežaset, ja dasto sii buhtistedje álbmoga, poarttaid ja muvrra.
31 De mun gohččon Juda oaivámuččaid goargŋut muvrra ala ja bidjen dasa guokte stuorra máidnunkoara. Nubbi dain vádjolii muvrra alde olgeš guvlui Duvdnepoartta guvlui. 32 Sin maŋis váccii Hošaja ja bealli Juda oaivámuččain ja 33 Asarja, Esra, Mešullam, 34 Juda, Benjamin, Šemaja ja Jeremia. 35 Sin maŋis bohte muhtun báhpat ja čuojahedje trompehtaid. Dat ledje Sakarja, Jonatana bárdni; su áddjá lei Šemaja, gean áhčči lei Mattanja, gean áhčči lei Mikaja, gean áhčči lei Sakkur, gean áhčči lei Asaf, 36 ja su virgeguoimmit Šemaja, Asarel, Milalai, Gilalai, Maai, Netanel, Juda ja Hanani. Sii čuojahedje daid čuojanasaid maid Ipmila olmmái David lei mearridan, ja Esra, čáloahppavaš, váccii sin ovddas. 37 Sii vázze Ájapoartta meattá ja das ain njuolga bajás boardaga Davida gávpogii, dan boardaga gokko muvra badjána Davida šloahta bajábeallái, ja nuorttas gitta Čáhcepoartta rádjái. 38 Nubbi máidnunkoarra vádjolii gurut guvlui, ja mun ovttas álbmoga nuppiin beliin vázzen dan maŋis. Mii vácciimet muvrra alde Ommantoartna meattá Govdamuvrii 39 ja doppe Efraimpoartta, Ješanapoartta, Guollepoartta, Hananeltoartna ja Meatoartna bokte Sávzaportii. Fáktapoartta gurrii mii čuoččaheimmet.
40 De goabbáge máidnunkoarra válddii iežas saji Ipmila viesus, nu maiddái mun ja ovttas muinna bealli oaivámuččain 41 ja báhpat Eljakim, Maaseja, Minjamin, Mikaja, Eljoenai, Sakarja ja Hananja geain ledje trompehtat, 42 ja Maaseja, Šemaja, Elasar, Ussi, Johanan, Malkia, Elam ja Eser. De lávlut lávlugohte, ja Jisrahja jođihii sin.
43 Dan beaivvi oaffaruššojuvvojedje stuorra oaffarat, ja buohkat illudedje, dasgo Ipmil lei addán sidjiide stuorra ilu. Nissonat ja mánát maid illudedje, ja illudeapmi gullui guhkás Jerusalemis.
44 Seammá beaivvi nammaduvvojedje olbmát gozihit vuorkálanjaid. Daidda ledje ráddjojuvvon oaffarattáldagat, álgošaddu ja logádasat maid báhpat ja levilaččat lága mielde galge oažžut gávpogiid bealdduin. Illu lei stuoris Judas dan dihte go báhpat ja levilaččat ledje fas bálvaleamen 45 ja atnimin fuola ipmilálvalusmeanuin ja buhtistanmeanuin. Maiddái lávlut ja uksafávttat bálvaledje nugo David ja su bárdni Salomo leigga mearridan. 46 Ledjehan juo dolin, Davida ja Asafa áigge, lávluin jođiheaddjit, go sii lávlo giittuslávlagiid ja máidnunlávlagiid Ipmilii. 47 Serubbabela ja Nehemja áigge buot israellaččat adde lávluide ja uksafávttaide dan maid sii dárbbašedje beaivválaččat. Olbmot adde levilaččaide bassi attáldagaid mat sidjiide gulle, ja levilaččatgis adde Arona bártniide sin oasi.