1 Buoret goikeláibebihttá ja ráfi
go viesu dievva herskot ja bealku.
2 Jierpmálaš šlávva
ráđđe gealbbohis bártni
ja oažžu árbet ovttas vieljažiiguin.
3 Silbii stážžu, gollái uvdna,
olbmuid váimmuid geahččala Hearrá.
4 Bahás olmmoš guldala bahás ságaid,
gielástalli billisteaddji sániid.
5 Dat gii bilkida geafi,
hiddjida su sivdnideaddji,
guhte illuda nuppi oasehisvuođa dihte,
ii beasa ráŋggáškeahttá.
6 Mánáidmánát leat vuorrasiid
kruvdnu,
bártniid gudni sin áhčit.
7 Stuorra sánit eai soaba doavkái,
velá uhcit giellásat ráđđejeaddjái.
8 Dat gii atná duolgguid,
gáddá daid leavvedolgin:
Gosa ihkinassii son boahtá,
de son birge.
9 Dat gii bivdá ustitvuođa,
gokčá meaddádusa,
gii dan muitáha, ádjá ustibis eret.
10 Cuiggodus cieggá jierpmálažžii
buorebut go čuođi časkkástaga jallii.
11 Bahás olmmoš bivdá aivve stuimmi;
su vuostá vuolggahuvvo
árpmuhis áirras.
12 Buoret lea boahtit guovžža njeaiga
mas čivggat leat rieviduvvon,
go jalla njeaiga su mielahisvuođas.
13 Jos olmmoš mávssaha buori baháin,
de su viesus oasehisvuohta ii gáidda.
14 Álggahit bealkku lea
dego ráhpat buođu;
heaitte eret ovdal go bealku buollá!
15 Dat gii dubme sivalačča sivaheapmin
ja dat gii dubme vigiheami sivalažžan –
Hearrá fasttáša goappašagaid.
16 Maid ávkkuha ruhta jalla gieđas?
Sáhttágo son oastit viissisvuođa
go sus juo váilu jierbmi?
17 Ustiba ráhkisvuohta
ii beahte goassege,
viellja lea riegádan veahkehit heađis.
18 Jierpmeheapme lea dat
gii addala gieđaid
ja dáhkida lagamuččas ovddas.
19 Dat gii ráhkista bealkkuid,
ráhkista suttu,
dat gii dahká uvssas allagin,
ohcá iežas heavu.
20 Behtolaš olmmoš ii gávnna lihku,
guoktilaš njuovčča jorralahttá.
21 Morraša oažžu dat
geas lea doavkkes bárdni,
jierpmeheami áhčis
ii leat mihkkege iluid.
22 Ilolaš váibmu addá dearvvašvuođa,
hearddohuvvan miella ástada dávttiid.
23 Bahás olmmoš roggá duolgguid
ozastis
vai beassá botnjat vuoigatvuođa.
24 Jierbmás olmmoš atná viisodaga
čalmmiid ovddas,
jalla várdá máilmmi ravddaid.
25 Doavkkes bárdni lea váivin
áhččásis,
bahča morašin
dasa guhte riegádahtii su.
26 Bahá lea jos sivaheapme sáhkohaddá,
beanta vuoigatvuođa vuostá
jos gutnálaš spihččejuvvo.
27 Jierpmálaš seastá sániidis,
lotkesmielat lea viissis.
28 Velá doavkige adnojuvvo viissisin
jos son orru jávohaga,
jierpmálažžan
jos son doallá njálmmi gitta.