1 Buoret geafi ja láitemeahttun
go rikkis ja gielástalli.
2 Go olmmoš lea ávvirmeahttun,
de ii áŋgirvuohtage ávkkut,
heahttás olmmoš čádjida
ja guossala.
3 Iežas jallodat čádjidahttá olbmo,
muhto Hearrái son bahána.
4 Rikkisvuohta buktá ollu ustibiid,
geafes olmmoš
massá vel áidna ustibisge.
5 Vearreduođašteaddji
ii beasa ráŋggáškeahttá,
gielástalli ii gáddjojuvvo.
6 Eatnagat dohkkestuvvet
stuorráide,
juohkehaš guoimmástallá
árvvas olbmuin.
7 Váivváš olbmo sogat fasttášit su,
su soiget velá su ustibatge.
Duššás son iská hálahit sin.
8 Dat gii háhká jierpmi,
ráhkista eallima,
gii váldá vára ipmárdusas,
gávdná buori.
9 Vearreduođašteaddji
ii beasa ráŋggáškeahttá,
dat gii dahká vearreváli, duššá.
10 Ii heive doavkái eallit valljivuođas,
velá uhcit šlávvii ráđđet oaivámuččaid.
11 Viissisvuohta dahká olbmo
guhkesmielalažžan,
su gudni lea addit ándagassii.
12 Gonagasa moarri lea dego
ledjona čeargun,
su árbmu nugo rási suoldni.
13 Doavkkes bárdni lea áhči
lihkohisvuohta,
áhká nággárvuohta
dego goaikun robi čađa.
14 Viessu ja opmodat lea árbi áhčiin,
jierpmálaš áhkká lea Hearrá attáldat.
15 Láikodat vuodjuda
losses nahkáriidda,
láikkan šaddá nealgut.
16 Dat gii doallá báhkkomiid,
várjala heakkas,
gii ii beroš das mo eallá, jápmá.
17 Dat gii árpmiha vártnuheami,
lone Hearrái,
ja Hearrá máksá sutnje su buori dagu.
18 Bagat bártnát go ain lea doaivu,
ithan don sáva su jápmima.
19 Moarrás olmmái oažžu ráŋggáštusa;
jos veahkehat su,
de šattat dahkat dan ain ođđasis.
20 Guldal neavvaga
ja váldde vára bagadusas,
vai maŋimus šattašit viissisin.
21 Olbmos leat ollu áigumušat,
muhto Hearrá dáhttu goit ovdána.
22 Vuovdáivuohta heahppášuhttá
olbmo;
buoret geafi go gielis.
23 Hearrá ballu doalvu eallimii;
gallásin olmmoš manná ija vuoiŋŋadussii
iige deaivvahala mange bahái.
24 Láiki nahkeha gieđa gárrái,
muhto ii gille bajidit dan njálbmái.
25 Cápme bilkideaddji,
de dáidemeahttumat jirbmet,
cuiggot viisá, de son viisu ain.
26 Heabuheapme ja vearrái dat bárdni
gii lea veahkaválddálaš áhččásis
ja ádjá eatnis eret.
27 Bárdni gii heaitá
guldaleames cuiggodusa,
čádjida dieđu sániin.
28 Návccahis duođašteaddji bilkida
dan mii lea riekta,
ipmilmeahttumiid njálbmi
golggaha bahávuođa.
29 Ráŋggáštus vuordá bilkideaddji,
cábmimat doavkki sealggi.