1 Gonagasa jurdagat leat Hearrá gieđas
dego jogažat,
son sojaha daid gosa dáhttu.
2 Olbmo geaidnu lea njuolgat
su iežas čalmmiin,
muhto Hearrá geahččala váimmu.
3 Daga dan mii lea riekta ja vuoigat,
dat lea Hearrái mávssoleabbo go oaffar.
4 Goargadis čalmmit
ja čeavlás váibmu –
ipmilmeahttumiid lámpá lea suddu.
5 Viššalvuohta ja suokkardeapmi
buktá valljugasvuođa,
huššáivuohta dušše vádjitvuođa.
6 Giellásiin fidnejuvvon dávvir
lea nohkavaš vuoiŋŋahat
ja jápmima giella.
7 Ipmilmeahttumat sorrojit
daguidasaset
go sii biehttalit dahkamis
dan mii lea riekta.
8 Sivalačča geaidnu lea moalkái,
buhtis olmmoš vádjola njuolga.
9 Buoret ássat dáhkkečiegas
go seammá viesus bealkálas áhkáin.
10 Ipmilmeahttun anistuvvá bahái,
ii son árpmit iežas lagamučča.
11 Jos bilkideaddji ráŋggáštuvvo,
de dat lea dáidemeahttumiidda oahppun;
oahpat viisá,
de son váldá vuostá dieđu.
12 Vanhurskkis Ipmil atná čalmmis
ipmilmeahttuma viesu,
son norddasta ipmilmeahttumiid
lihkuhisvuhtii.
13 Dat gii notká beljiid
gullamis geafes olbmo čuorvuma,
šaddá ieš čuorvut,
muhto ii oaččo vástádusa.
14 Čiegus attáldat jaskkodahttá moari,
ohcii čihkkojuvvon duolgu garra suhtu.
15 Go vuoigatvuohta dahkkojuvvo,
de vanhurskkis illuda,
muhto vearredahkkái dat lea suorggahus.
16 Dat gii čádjida
jierpmálašvuođa geainnus,
gártá jámežiid searvái.
17 Geafes olmmájin šaddá dat
gii ráhkista suohttasiid;
gii ráhkista viinni ja oljju,
ii rikko goassege.
18 Ipmilmeahttun šaddá
vanhurskása lonisin,
beahtti gártá vuoigatlačča sadjái.
19 Buoret ássat ávdin eatnamis
go bealkálas ja buošes áhkáin.
20 Viisá viesus leat mávssolaš dávvirat,
jallas olmmoš skihtarda visot.
21 Dat gii váinnuha vanhurskkisvuođa
ja oskkáldasvuođa,
oažžu eallima ja gudni.
22 Viissis olmmái váldá
veagalaččaid gávpoga
ja gaikkoda sin dorvvolaš suoji.
23 Dat gii váruha iežas njálmmi
ja njuokčama,
várjala iežas áŧestusain.
24 Bilkára nama oažžu snielis
ja čeavlás olmmoš,
su goarratvuođas ii leat mearri.
25 Láikkana hálidus šaddá sutnje
sorbmin,
go su gieđat biehttalit bargamis.
26 Jalla lea álo váldimin,
vanhurskkis addá iige hánástatta.
27 Ipmilmeahttumiid oaffar
lea fastivuohta,
erenoamážit go sii buktet dan
gávvilis áigumušain.
28 Behtolaš duođašteaddji bártašuvvá,
ávddalaš olbmo guldalit.
29 Ipmilmeahttun láhtte heabuheamit,
vuoigatlaš olmmoš vádjola stáđđásit.
30 Ii mihkkege viissisvuođaid,
jirpmiid iige ráđiid
veahket Hearrá vuostá.
31 Heasta sádelastojuvvo
soahtebeaivvi várás,
muhto Hearrá addá vuoittu.