1 Ale gáđaš bahás olbmuid,
ale vikka sin searvái.
2 Sii jurddašit aivve veahkaválddi,
buot maid sii sárdnot
buktá lihkuhisvuođa.
3 Viissisvuođain viessu huksejuvvo,
jierbmi dahká dan nanusin,
4 diehtu deavdá dan gámmáriid
buot mávssolaš ja čáppa gálvvuiguin.
5 Dat gii lea viissis, lea gievra,
čeahpes olmmoš nanosmahttá
iežas fámu;
6 soahtamii don dárbbašat
neavvagiid,
eatnat ráđđeaddiid vai vuoittát.
7 Viissisvuohta lea doavkái beare allat;
ráđđádallamis son ii rabas njálmmi.
8 Dat gii hutká baháid,
gohčoduvvo juonalažžan.
9 Jallas olbmo juonat leat suddu,
buohkat fasttášit bilkideaddji.
10 Jos don hearddohuvat
go boahtá áŧestus,
de du fápmu lea headju.
11 Gájo daid geat dolvojuvvojit jápmimii,
veahket daid geat suibot
steavlidanbáikái.
12 Jos dajat: “Eathan mii dan diehtán”,
de son gii suokkarda váimmuid, oaidná,
du heakka goziheaddji diehtá,
ja son máksá juohkehažžii
su daguid bálkká.
13 Bora honnega, bártnážan,
dasgo dat lea buorre,
fiinna honnet lea njálggat du guopmái.
14 Dakkár lea ipmárdus ja viissisvuohta
du sillui;
jos gávnnat dan,
dalle dus lea boahtteáigi,
iige du doaivu šatta duššin.
15 Ale vuođŋŋe vanhurskása viesu
dego ipmilmeahttun,
ale heavat su ruovttu.
16 Čieža geardde sáhttá vanhurskkis
gahččat ja čuožžilit fas,
muhto ipmilmeahttumat gahččet
go lihkuhisvuohta boahtá.
17 Ale illut go du vašálaš gahččá,
ale ávvut go son jorrala,
18 vai Hearrá ii bahánivčče dutnje
ja jorgalivčče iežas moari sus eret.
19 Ale hárpma bahádahkkiide
alege gáđaš ipmilmeahttumiid,
20 danin go bahás olbmos
ii leat boahtteáigi,
ja ipmilmeahttumiid lámpá čáská.
21 Bártnážan, bala Hearrás
ja bala gonagasas.
Ale guoibmádala daiguin
geat áigot stuimmáskit.
22 Lihkuhisvuohta sáhttá deaividit sin
fáhkkestaga.
Makkár dalle lea sin ráŋggáštus!
23 Maiddái dát leat viisáid sánit:
Dubmedettiin ii leat riekta geahččat
olbmo hápmái.
24 Gii cealká sivalačča sivaheapmin,
dan buohkat garuhit ja soibmet,
25 muhto daidda geat dubmejit riekta,
geavvá bures,
sin oassi lea lihkku ja buressivdnádus.
26 Dego cummá baksamiidda
lea vuoiggalaš vástádus.
27 Ollašuhte vuos doaimmaidat olgun
ja daga bealddu gárvvisin;
de dasto oaččut hukset iežat viesu.
28 Ale duođaš lagamuččat vuostá
almmá ášši haga;
Almma it dáhto beahttit sániidatguin?
29 Ale daja:
“Nugo son dagai munnje,
nu munge dagan sutnje,
mun mávssahan sutnje su daguid.”
30 Mun vázzen láikkes olbmá
bealddu meattá,
jierpmehis olbmá viidnegárddi guora.
31 Gáskálasat ledje šaddan dasa dievva,
oppa eatnama gokče árvvohis rásit
ja geađgeáidi lei gahččan.
32 Mun válden vuhtii dan maid oidnen,
ja mun válden das cuiggodusa.
33 Nohkas vel veaháš,
ajihustte uhccánaš,
vuoiŋŋas ain oanehis bottu
ruossalas gieđaid,
34 de geafivuohta falleha du
dego rievvár,
vádjitvuohta nugo vearjoolmmái.