1 Ale rámit ihtáš beaivvi,
ithan don dieđe mii das lea askkis.
2 Rámidehkos du muhtun eará,
ii du iežat njálbmi,
vierroolmmoš, eai du iežat baksamat.
3 Geađgi lea lossat, sáttu deaddá,
muhto vel losit lea doavkki suhttu.
4 Suhttu lea garas, moarri dego dulvi,
muhto gii ceavzá
balahahkesvuođain?
5 Buoret almmus cuiggodeapmi
go čihkkojuvvon ráhkisvuohta.
6 Ustiba časkkástat lea vuoiggalaš,
vašálačča cummát behttet.
7 Gallánan olmmoš hilgu
fiidnámus honnega,
nealgeolbmui lea rihčanai njálggat.
8 Nugo cizáš mii lea girdilan beasis,
nu lea olmmoš guhkkin ruovttustis.
9 Olju ja suovvasat illudahttet váimmu,
ustitvuođa njálgodat nanosmahttá sielu.
10 Ale hilggo iežat ustiba
alege áhčát ustiba,
heahtebeaivvi ale mana vieljat vissui.
Buoret lagaš siidaguoibmi
go gáiddus viellja.
11 Šatta viissisin, bártnážan,
de don illudahtát mu váimmu;
don leat buoremus vástádus daidda
geat hiddjidit mu.
12 Viissis oaidná vára ja náđđu,
dáidemeahttun manná njeaiga
ja šaddá gillát.
13 Váldde biktasiid das
gii dáhkida vierroolbmo,
gáibit pántta jos son dáhkida
amas olbmo.
14 Jos muhtun buressivdnida
lagamuččas jitnosii árrat iđedis,
de dat adnojuvvo garuhussan.
15 Dego oktilaš dáhkkegoaikun
arvebeaivvi
lea bealkálas áhkká.
16 Su caggat lea dego biekka caggat,
dego dohppet oljju gieđain.
17 Ruovdi ruovddi sadjá,
olmmoš nuppi olbmo.
18 Gii dikšu fiikonmuora,
beassá borrat dan šaddosiid,
gii bálvala bures iežas isida,
gudnejahttojuvvo.
19 Čáhcegierragis oainnát iežat muođuid,
nuppi olbmos iežat váimmu.
20 Jábmiidáibmu ja čiekŋalas eai gallán,
eai gallán olbmo čalmmitge.
21 Silba geahččaluvvo stáččus ja golli uvnnas,
ja olmmoš go son rábmojuvvo.
22 Molle doavkki cuvkenlihtis,
cuvke su gortniid seahká:
Ii dattetge gáidda sus su jallavuohta.
23 Geahča bearrái sávzzaidat,
ane fuola ealustat.
24 Riggodat ii bistte agálaččat
iige dávvir buolvvas bulvii.
25 Go suoinnit leat ráddjojuvvon,
ja varas rássi ihtá,
go ávji čohkkejuvvo váriin,
26 dalle dus leat lábbát
main oaččut biktasiid
ja bohkát maiguin sáhtát
oastit eatnamiid,
27 valjit gáiccamielki
du iežat ja du bearraša biebmun,
bálvánieiddaidat ealáhussan.