1 Olmmái gii lea dávjá ráŋgojuvvon
ja almmatge buoššuda váimmus,
doddjojuvvo fáhkkestaga,
iige leat veahkki.
2 Go vanhurskásat leat ollu,
de álbmot illuda,
go ipmilmeahttun ráđđe,
de olbmot šuhkket.
3 Dat gii ráhkista viissisvuođa,
illudahttá áhčis,
opmodagas skihtarda dat
gii fitná fuoráid luhtte.
4 Vuoigatvuođain
gonagas nanosmahttá eatnamis,
dat gii lasiha vearuid, goarida dan.
5 Gii dohkkestuvvá nubbái,
lea lebbemin fierpmi su bálgái.
6 Bahás olmmoš sorro iežas suddui,
vuoigatlaš oažžu ávvudit ja illudit.
7 Vanhurskkis atná fuola
váivváša vuoigatvuođas,
ipmilmeahttun ii das beroš.
8 Bilkárat háhttejit oppa gávpoga,
viisát jaskkodahttet moari.
9 Go viisás lea ášši jallain,
de jalla rieibmuda ja boagusta,
iige orrunmáššu šatta.
10 Varraváibmilis olbmot vašuhit
láitemeahttuma,
muhto vuoigatlaččat gáhttejit su heakka.
11 Doavki luoitá olggos buot iežas moari,
muhto viissis olmmoš steađđá.
12 Jos ráđđejeaddji guldala giellásiid,
de son oažžu bálván dušše skealmmaid.
13 Váivváš ja givssideaddji
gávnnadeaba;
Hearrá addá čuovgga
goappašagaid čalmmiide.
14 Go gonagas dubme gefiid
vuoigatlaččat,
de su truvdnu bissu nanusin.
15 Rissi ja bagadus addet viissisvuođa,
huvddahis bárdni
heahppášuhttá eatnis.
16 Go ipmilmeahttumat eatnánit,
de suddu lassána,
muhto vanhurskásat besset oaidnit
sin gahččat.
17 Bagat bártnát,
de son áhpásmahttá du,
son addá ilu du váibmui.
18 Go eai leat profehtat,
de álbmot čádjida,
ávdugas dat gii doallá lága.
19 Ii bálvaleaddji leat bagadeames
sániiguin;
son gal ipmirda, muhto ii jeagat.
20 Leatgo oaidnán duoldalas olbmo?
Eambbo doaivu lea doavkái go sutnje.
21 Jos bálvá jiellahallojuvvo
nuorravuođa rájes,
de loahpas son šaddá nággárin.
22 Hohpposlunddot olmmoš
dagaha riiddu,
moarrás olmmái rihkku ollu.
23 Čeavláivuohta vuolida olbmo,
vuollegis olmmoš oažžu gudni.
24 Gii veahkeha suollaga,
vašuha heakkas,
son gal gullá garuhusa,
muhto orru jávohaga.
25 Dat gii ballá olbmuin,
bidjá alccesis giela,
muhto dat gii dorvvasta Hearrái,
lea oadjebas.
26 Eatnagat vigget
beassat ráđđejeaddji muođuid ovdii,
muhto olbmo vuoigatvuohta
boahtá Hearrás.
27 Vanhurskásat fasttášit vearredahkki,
ipmilmeahttumat fasttášit vuoiggalačča.