Sálbma 110
1 Davida sálbma.
Hearrá cealká mu hearrái:
“Čohkán mu olgeš beallái,
de mun bijan du vašálaččaid
du julggiid vuolušin.
2 Sionis Hearrá geige dutnje fámu soappi.
Ráđđe dal vašálaččaidat!
3 Du álbmot čoaggana millosit
dan beaivvi go don oaččut válddi.
Bassi váriin mun riegádahtten du
dego suolnni iđedisroađi askkis.”
4 Hearrá lea vurdnon váli iige dan gáđa:
“Don leat báhppa agálašvuhtii,
du báhppavuohta lea
Melkisedeka báhppavuohta.”
5 Hearrá lea du olgeš gieđa bealde.
Iežas moari beaivvi
son cuvke gonagasaid,
6 son dubme álbmogiid:
Das leat dievva rupmašat,
miehtá eatnama
oaivámuččaid oaivvit.
7 Mátkkis son juhká jogažis.
Allagassii son bajida oaivvi.