Sálbma 118
1 Giitet Hearrá!
Son lea buorre,
su árbmu bistá agálaš áigái.
2 Celkos Israela álbmot:
Su árbmu bistá agálaš áigái.
3 Celkos Arona sohka:
Su árbmu bistá agálaš áigái.
4 Celket, dii Hearrá bálvaleaddjit:
Su árbmu bistá agálaš áigái.
5 Áŧestusas mun čurvon Hearrái.
Son gulai mu ja doalvvui mu friddjavuhtii.
6 Go Hearrá lea muinna,
de mun in bala mastege.
Maid dalle vedjet olbmot dahkat munnje?
7 Go Hearrá lea muinna ja veahkeha mu,
de mun sáhtán
geahččat vašuheddjiidasan
inge bala.
8 Buoret lea dorvvastit Hearrái
go luohttit olbmuid veahkkái.
9 Buoret lea dorvvastit Hearrái
go luohttit stuorráid veahkkái.
10 Buot álbmogat birastahtte mu,
muhto mun časken daid Hearrá vehkiin.
11 Dat čoagganedje mu birra
juohke guovllus,
muhto mun časken daid Hearrá vehkiin.
12 Dat birastahtte mu dego mieđašeanit,
muhto jávkkihedje
dego buolli bastilislánját.
Mun časken daid Hearrá vehkiin.
13 Mu vašálaččat norddastedje mu
nu ahte mun masá gahččen,
muhto Hearrá bođii munnje veahkkin.
14 Hearrá lea mu fápmu ja máidnunlávlla,
son besttii mu.
15 Gullet, ávvudeapmi ja vuoitočuorvasat
gullojit vanhurskásiid gođiin:
Hearrá giehta lea čájehan fámus!
16 Hearrá giehta lea min badjelis.
Hearrá giehta lea čájehan fámus!
17 In mun jáme, mun ealán
ja muitalan Hearrá daguid.
18 Garrasit Hearrá bagadii mu,
muhto son ii addán mu jápmima gihtii.
19 Rabastehket munnje
vanhurskkisvuođa poarttaid!
Mun manan sisa ja giittán Hearrá.
20 Dát lea Hearrá poarta,
dákko ožžot vanhurskásat mannat.
21 Mun giittán du, go don gullet mu
ja gádjot mu.
22 Geađgi maid huksejeaddjit hilgo,
lea šaddan čiehkageađgin.
23 Hearrá lea dan dahkan,
ja dat lea ovddolaš min čalmmiide.
24 Dát lea dat beaivi
maid Hearrá lea dahkan,
ávvudehkot ja illudehkot!
25 Hearrá, beastte min!
Hearrá, divtte min lihkostuvvat!
26 Buressivdniduvvon lehkos son
guhte boahtá Hearrá nammii!
Mii buressivdnidit din Hearrá viesus.
27 Hearrá lea Ipmil,
son attii midjiide čuovgasa.
Mannet ávvujoavkun, lastaoavssit gieđas,
gitta áltára čorvviid rádjái.
28 Don leat mu Ipmil, mun giittán du,
Ipmilan, mun rámidan du sakka.
29 Rámidehket Hearrá,
dasgo son lea buorre,
su árbmu bistá agálaš áigái.