Sálbma 128
1 Bassivádjoluslávlla.
Ávdugas dat gii ballá Hearrás
ja vádjola su geainnuid.
2 Don beasat návddašit
rahčamušaidat šattuid.
Don leat ávdugas, dutnje geavvá bures!
3 Dego šattolaš viidnemuorra
lea du áhkká du viesus,
nugo oliivamuora vesát
leat du mánát du beavddi birra.
4 Nu buressivdniduvvo
dat olmmái gii ballá Hearrás.
5 Hearrá buressivdnidehkos du Sionis!
Don beasat oaidnit Jerusalema lihku
buot eallinbeivviidat,
6 don beasat oaidnit mánáidat mánáid.
Ráfi Israelii!