Sálbma 135
1 Halleluja!
Máidnot Hearrá nama,
máidnot, dii Hearrá bálvaleaddjit,
2 dii geat čuožžubehtet Hearrá tempelis,
min Ipmila viesu ovdašiljuin!
3 Máidnot Hearrá, dasgo son lea buorre!
Máidnot su nama, dasgo dat lea hávski!
4 Hearrá lea válljen alccesis Jakoba,
son lea dahkan Israela
mávssolaš opmodahkanis.
5 Hearrá lea stuoris, mun dieđán dan,
min Hearrá lea stuorit go buot ipmilat.
6 Buot maid Hearrá dáhttu,
son dahká almmis ja eatnama alde,
mearain ja čiekŋalis čáziin.
7 Son diktá balvvaid badjánit
eatnama ravddas,
son dahká álddagasaid
ja diktá arvvi gahččat,
son vuolggaha biekka dan rádjosis.
8 Son časkkii Egypta vuosttašriegádeddjiid,
sihke olbmuid ja omiid.
9 Du eatnamis, Egypta,
son dagai mearkkaid ja oavdduid
faraoi ja buot su bálvaleddjiide.
10 Son časkkii ollu álbmogiid
ja gottii fámolaš gonagasaid:
11 Sihona, amorlaččaid gonagasa,
Oga, Bašana gonagasa,
ja buot Kanaana gonagasriikkaid.
12 Son attii sin eatnamiid
álbmogasas opmodahkan,
árbeeanamin Israelii.
13 Hearrá, du namma lea agálaš!
Hearrá, du namma gulahuvvo
buolvvas bulvii.
14 Hearrá addá vuoigatvuođa álbmogasas,
son árpmiha bálvaleddjiidis.
15 Álbmogiid ipmilat leat silba ja golli,
olbmogieđaid duodji.
16 Dain lea njálbmi, muhto eai dat sártno,
dain leat čalmmit, muhto eai dat oainne.
17 Dain leat bealjit, muhto eai dat gula,
ii daid njálmmis leat ii vuoiŋŋanasge.
18 Dat geat daid ráhkadit,
šaddet daid láhkásažžan,
buohkat geat dorvvastit daidda.
19 Israela sohka, máinno Hearrá,
Arona sohka, máinno Hearrá!
20 Levi sohka, máinno Hearrá,
buohkat geat ballabehtet Hearrás,
máidnot su!
21 Máidnojuvvon lehkos Siona Hearrá,
son gii ássá Jerusalemis.
Halleluja!