Sálbma 140
1 Koarrajođiheaddjái. Davida sálbma.
2 Hearrá, gájo mu bahás olbmuin,
gáhtte mu veahkaválddálaš olbmáin,
3 dain geaid váimmus leat bahás jurdagat,
geat juohke beaivvi leat hástimin riidui.
4 Sii leat sadján njuokčameaset
bastilin dego guovddi njuovčča,
gearbmašmirko sis lea baksamiin. Sela
5 Hearrá, várjal mu
ipmilmeahttumiid gieđas,
gáhtte mu veahkaválddálaččain
geat dáhttot jorralahttit mu.
6 Čeavlás olbmot leat bidjan
gielaid ja báttiid mu várás,
suohpáhis olbmát leat njulgen fierpmi
mu geainnu rastá,
čiehkan bivdosiid mu bálgá gurrii. Sela
7 Mun luohtán dutnje, Hearrá,
don leat mu Ipmil,
guldal maid mun ánun dus.
8 Hearrá, don leat mu veagalaš beasti,
du giehta suodjala mu soađis.
9 Hearrá, ale suova ipmilmeahttumiid
sávaldagaid ollašuvvat,
daga duššin sin áigumušaid.
Sela
10 Ale suova vuoitit daid
geat čoagganit mu birra,
divtte sin áitagiid deaividit sin iežaset.
11 Divtte áhcagas hilaid gahččat sin ala,
hoigat sin rokkiide
main sii eai beasa bajás.
12 Dat gii sárdnu sealggebealde,
ii oaččo eallit eatnamis.
Vare oasehisvuohta deaividivččii
veahkaválddálačča,
vare lihkohisvuođat
časkkášedje su eatnamii.
13 Mun dieđán ahte don, Hearrá,
veahkehat váivváša,
don doaimmahat vártnuhis olbmui
vuoigatvuođa.
14 Vanhurskásat rámidit du nama,
vuoigatlaš olbmot ožžot ássat du lahka.