Sálbma 17
1 Davida rohkadus.
Hearrá, gula mu vuoigatlaš ášši,
fuomáš go mun čuorvvun.
Guldal mu rohkadusa – dat boahtá
vuoigadis baksamiin.
2 Dus mun vuorddán vuoigatvuođa.
Du čalmmit oidnet mii lea duohta.
3 Don geahččalat mu váimmu,
iskkadat dan ihkkunai,
don guorahalat mu,
muhto it gávnna mus vearrivuođa.
Mun in suddut njálmmiinan
4 olbmuid láhkái.
Du sáni mielde mun lean váruhan
veahkaválddálaččaid bálgáin.
5 Mun lean vádjolan du luottaid,
mu juolggit eai leat suibbodan.
6 Mun čuorvvun du, Ipmil,
ja don vástidat munnje.
Guldal mu, gula mu sániid,
7 čájet munnje iežat ovddolaš
buorrevuođa.
Don beasttát olgeš gieđainat
daid geat báhtarit vašálaččain
ja ohcet suoji du luhtte.
8 Várjal mu dego čalbmegáhkát,
čiega mu soajáidat suoivanii
9 ipmilmeahttumiin
geat fallehit mu,
jápminvašálaččain
geat birastahttet mu.
10 Sii leat garradan váimmuset
ja váldán njálbmái čeavlás sániid.
11 Dál sii birastahttet mu
gosa ain manan,
sii fáktejit mu
ja dáhttot časkit mu eatnamii.
12 Sii leat dego gaikkodeaddji
nealgeledjon,
nugo vuođgŋi beahtu.
13 Čuožžil, Hearrá!
Vuosttil vašálačča ja časkke su eatnamii!
Beastte mihkiinat mu heakka
ipmilmeahttumis.
14 Hearrá, beastte mu gieđainat
dán máilmmi olbmuin,
dain geat leat ožžon
bálkkáset dán eallimis.
Muhto gallet daid
geaid don suodjalat,
divtte sin gallánit
ja guođđit valljugasvuođa
mánáidasaset.
15 Mun beasan oaidnit du muođuid
danne go mun lean vuoiggalaš.
Go gohccán, de mun gallánan
du muođuid oaidnimiin.