Ukraina flaggRedder Bibelen liv i Ukraina?
Finn ut mer
Gå til forsiden

Sálmmaid girji

22

Sálbma 22

1 Koarrajođiheaddjái. Dego “Iđedisgukso goddeáldu”. Davida sálbma.


2 Ipmilan, Ipmilan,

manne leat mu guođđán?

Mun váidalan heađistan,

muhto don leat guhkkin.

3 Ipmilan, mun čuorvvun du beaivet,

muhto don it vástit,

ja ihkku, inge oaččo mášu.

4 Dattetge don leat bassi,

du truvdnui badjánit

Israela rámáduslávlagat.

5 Dutnje dorvvastedje min áhčit,

dutnje sii dorvvastedje,

ja don bestet sin.

6 Sii čurvo du, ja don gádjot sin,

sii dorvvastedje dutnje

eaige beahtahallan.


7 Muhto mun lean máhtu inge olmmoš,

juohkehaš bilkida mu,

olbmot badjelgehččet mu.

8 Buohkat geat oidnet mu,

bilkidit mu,

sii njezzot, bárdet oaivvi ja dadjet:

9 “Son lea dorvvastan Hearrái,

gádjos dal Hearrá su.

Bestos Hearrá su, go juo ráhkista su!”

10 Donhan gesset mu eatni goaŧus,

don diktet mu orrut oadjebassan

eatni ratti vuostá.

11 Riegádeami rájes mu eallin

lea leamaš du gieđas,

eatni goaŧu rájes don

leat leamaš mu Ipmil.

12 Ale leage guhkkin,

dasgo áŧestus lea mu lahka,

iige oktage veahket mu.

13 Mu birra leat eatnat vuovssát,

Bašana burrut birastahttet mu.

14 Dat cagget munnje njálmmi

dego gaikkodeaddji, čeargu ledjonat.

15 Mu fápmu golgá eatnamii dego čáhci,

buot mu dávttit luovvanit.

Mu váibmu lea dego gáhčči,

dat suddá rattistan.

16 Mu čotta lea goikan

dego láirálihttebihttá,

mu njuovčča darvánaddá guopmái.

Don bijat mu jápmima muldii.

17 Beatnagat birastahttet mu,

veahkaválddálaččat čohkiidit mu birra,

sii ráiget mu gieđaid ja julggiid.

18 Mun sáhtán lohkat buot dávttiidan.

Olbmot gávket, sii gehččet munnje.

19 Sii juogadit gaskaneaset mu biktasiid

ja vuorbádit mu gárvvu.

20 Hearrá, ale leage mus guhkkin,

mu gievravuohta, doama veahkehit mu!

21 Gájo mu miehkis,

gájo mu divrras heakka beatnagiin!

22 Beastte mu ledjona njálmmis,

beastte mu meahcivuovssáid čorvviin!


23 Mun gulahan du nama vieljaidasan,

máinnun du searvegottis:

24 “Máidnot Hearrá,

dii geat ballabehtet Hearrás,

Jakoba nálli, gudnejahte su!

Bala sus, Israela nálli!

25 Ii son badjelgeahččan váivváša

iige fasttášan vártnuheami

vártnuhisvuođa.

Ii son čiehkan sus muođuidis,

muhto gulai go son čuorvvui veahki.”

26 Dus boahtá mu rámáduslávlla,

go mun rámidan du stuorra čoakkalmasas.

Mun ollašuhtán lohpádusaidan

daid čalmmiid ovddas geat ballet dus.

27 Váivvášat borret ja gallánit,

dat geat ohcet Hearrá, rámidit su.

Ellos din váibmu agálaš áigái!


28 Muitoset buot eatnama ravddat

Hearrá daguid

ja jorgalehkoset Hearrá beallái,

gopmirdehkoset sutnje

buot álbmogiid sogat,

29 dasgo gonagasváldi gullá Hearrái.

Son ráđđe álbmogiid.

30 Gopmirdehkoset sutnje

buot eatnama válddálaččat,

sojaldahttoset čippiid sutnje

buohkat geat njidjet muldii.

Muhto mun ealán Hearrái,

31 mu mánát bálvalit su

ja muitalit su daguid

boahtti buolvvaide.

32 Ođđa buolvvaide sii gulahit

Hearrá vanhurskkisvuođa,

dasgo son lea dahkan dán.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.