Sálbma 34
1 Davida sálbma, go son lei dahkaluddan mielaheapmin Abimeleka ovddas ja Abimelek lei ádján su eret.
2 Mun máinnun álo Hearrá,
mu njálbmi rámida su čađat.
3 Mu siellu addá gudni Hearrái,
vuollegis olbmot gullet dan
ja illudit.
4 Máidnot muinna Hearrá,
rámidehkot ovttas su nama!
5 Mun ohcen Hearrá,
ja son vástidii munnje,
son besttii mu buot balus.
6 Dat geat gehččet sutnje,
báitet ilus,
sin muođut eai goassege
ruvssot heahpanemiin.
7 Dás lea vártnuheapme gii čuorvvui.
Hearrá gulai mu ja besttii mu
buot mu áŧestusain.
8 Hearrá eŋgel várjala
su oskkáldas olbmuid
ja beastá sin.
9 Muosáhehket ja oidnet
ahte Hearrá lea buorre!
Ávdugas dat gii dorvvasta sutnje.
10 Ballet Hearrás, su bassi olbmot!
Ii mihkkege váillo dain,
geat ballet sus.
11 Ledjonat gillájit heađi ja nelgot,
muhto dain geat ohcet Hearrá,
ii váillo mihkkege buriid.
12 Mánážiiddán, bohtet
guldalit mu,
mun oahpahan din ballat Hearrás.
13 Leago dus miella buori eallimii,
hálidatgo vásihit lihkolaš beivviid?
14 Várut dalle iežat njuokčama bahás,
baksamiiddát behtolaš sárdnumis.
15 Hilggo bahá ja daga buori,
bivdde ráfi ja váinnut dan!
16 Hearrá čalmmit gehččet
vanhurskásiidda,
su bealjit gullet sin čuorvasiid.
17 Hearrá jorgala muođuidis
daid vuostá geat dahket bahá,
son duššada eatnamis
sin muittuge.
18 Vanhurskásat čurvot,
ja Hearrá gullá
ja gádju sin buot áŧestusain.
19 Hearrá lea daid luhtte
geain lea doddjojuvvon váibmu,
son beastá daid
geaid vuoigŋa lea cuvkejuvvon.
20 Vanhurskkis olbmos
leat ollu váivvit,
muhto Hearrá gádju su buot dain.
21 Son várjala buot su dávttiid,
ii oktage dain cuovkan.
22 Lihkuhisvuohta goddá
ipmilmeahttuma,
dat geat vašuhit vanhurskása,
leat sivalaččat.
23 Muhto Hearrá lonista
bálvaleddjiidis heakka,
ii oktage gii dorvvasta sutnje,
šatta sivalažžan.