Sálbma 40
1 Koarrajođiheaddjái. Davida sálbma.
2 Guhká mun vurden Hearrá,
ja son gopmirdii mu beallái
ja gulai mu čuorvasa.
3 Son gesii mu bajás
heavahusa rokkis,
čiekŋalis rábáhis.
Son bijai mu julggiid bávtti ala,
son dagai mu lávkkiid nanusin.
4 Son attii mu njálbmái
ođđa lávlaga,
ávvulávlaga min Ipmilii.
Eatnagat oidnet dan, ballet
ja dorvvastit Hearrái.
5 Ávdugas dat olmmoš
gii luohttá Hearrái,
gii ii oza veahki nággáris olbmuin
iige dain geat jorralit giellásii.
6 Hearrá, mu Ipmil, eatnagat leat
du oavdudagut,
don dáhtut midjiide buori.
Ii oktage leat du veardásaš!
Mun hálidan gulahit
ja muitalit daid,
muhto dat eai leat logahallamis.
7 Njuovvanoaffara
ja borramušoaffara don it dáhto,
boaldinoaffara ja suddooaffara
don it gáibit,
muhto don addet munnje
beljiid mat gullet.
8 Danne mun dadjen:
Dás mun lean.
Girjegerrui lea čállojuvvon
maid mun galggan dahkat.
9 Ipmil, mu hállu lea dahkat
du dáhtu,
du láhka lea mu váimmus.
10 Mun almmuhan
du vanhurskkisvuođa
stuorra čoakkalmassii.
Mun in heaitte sárdnumis,
donhan dieđát dan, Hearrá.
11 Mun in čiega
du vanhurskkisvuođa,
mun gulahan du oskkáldasvuođa
ja bestojumi.
Mun in čiega du árbmugasvuođa
ja duohtavuođa
stuorra čoakkalmasas.
12 Hearrá, don it biehttal mus
váibmoláđisvuođat.
Du árbmugasvuohta ja duohtavuohta
suodjala mu álelassii.
13 Lohkameahttun áŧestusat
birastahttet mu.
Mu vearredagut leat joksan mu,
mun in veaje oaidnit daid,
dat leat eambbo go vuovttat mu oaivvis.
Mu roahkkatvuohta lea guođđán mu.
14 Leage árbmugas, Hearrá, gájo mu!
Hearrá, gáhča veahkehit mu!
15 Vare dat geat bivdet mu heakka
šattašedje heahpanit ja bilkiduvvot.
Vare dat geat sávvet munnje lihkuhisvuođa,
gáiddašedje heahpanemiin.
16 Vare mu hiddjideaddjit
suorganivčče
ja šattašedje heahpanit.
17 Illudehkoset ja ávvudehkoset
dus buohkat geat ohcet du.
Dadjoset álo dat geat ráhkistit
du bestojumi:
“Hearrá lea stuoris!”
18 Mun lean vártnuheapme
ja váivváš,
muhto Hearrá atná mus fuola.
Don leat mu veahkki ja mu beasti.
Ipmilan, ale ádján!