Sálbma 44
1 Koarrajođiheaddjái. Korahlaččaid oahpahansálbma.
2 Ipmil, mii leat gullan
iežamet beljiiguin,
min áhčit leat muitalan midjiide
maid don dahket sin áigge,
don dolin.
3 Donhan ádjet gieđainat
álbmogiid eret,
muhto min áhčiid
don gilvet dán eatnamii,
don duššadit álbmogiid,
muhto min áhčiid don diktet leavvat.
4 Eai sii váldán eatnama mihkiin,
sin iežaset giehta ii addán
sidjiide vuoittu,
muhto du giehta, du fápmu
ja du muođuid čuovga,
dasgo don ráhkistit sin.
5 Aivve don leat mu gonagas
ja Ipmil,
don attát Jakobii vuoittu.
6 Du vehkiin mii njeaidit
vašálaččaid,
du nammii mii duolbmat
vuostálastiid.
7 Mun in dorvvas dávgái,
miehkki ii gájo mu.
8 Muhto don beasttát min
min vašálaččain,
don bijat
min vašuheddjiid heahpanit.
9 Mii rámidit Ipmila álohii,
giitit su nama
agálaš áigái. Sela
10 Almmatge don nordadit min eret
ja bidjet min heahpanit,
it vuolgán min soahteveagaiguin.
11 Don bidjet min báhtarit
vašálaččas,
min vašuheaddjit rievidedje min.
12 Don dahket min
sin njuovvansávzan,
don biđgejit min álbmogiid gaskii.
13 Don vuvdet iežat álbmoga hálbái,
it dahkan vuoitogávppi.
14 Don dahket min bogostahkan ránnjáidasamet,
dat geat ásset min birra,
bilkidit ja hiddjidit min.
15 Mii leat šaddan
sátnevájasin buot álbmogiidda,
min geažil olbmot bárdet oaivvi.
16 Mu heahpat lea álo
čalmmiidan ovddas,
mu ámadadju ruvssoda heahpadis
17 go mun šattan guldalit
bilkáriid ja hiddjideddjiid,
go mun oainnán vašálačča
gii hálida mávssahit.
18 Buot dát lea deaividan min,
vaikko mii eat leat vajáldahttán du
eatge rihkkon du lihtu.
19 Min váibmu ii leat gáidan dus,
min lávkkit eai leat earránan
du geainnus.
20 Almmatge don leat cuvken min
dego guovddi
ja gokčan min
seavdnjadeamos suoivaniin.
21 Jos mii livččiimet vajáldahttán
Ipmileamet nama
ja geaigguhan gieđaid
vieris ipmila beallái,
22 almma Ipmil dalle
livččii fuobmán dan?
Sonhan dovdá min váimmu
čiegus jurdagiid.
23 Muhto du dihte mii goddojuvvot
geažos beaivvi,
mii adnojuvvot njuovvansávzan.
24 Gohccá, Hearrá!
Manne don oađát?
Lihka, ale hilggo min agálaš áigái!
25 Manne don čiegat muođuidat,
manne vajáldahtát min heađi
ja áŧestusa?
26 Min siellu lea sodjalahtton
muldii,
min rumaš deddojuvvon eatnamii.
27 Čuožžil ja boađe midjiide
veahkkin,
lonis min, donhan leat árbmugas!