Sálbma 49
1 Koarrajođiheaddjái. Korahlaččaid sálbma.
2 Gullet dán, buot álbmogat,
guldalehket, buot máilmmi ássit,
3 sihke heajut ja fámolaččat,
sihke riggát ja váivvášat!
4 Mu njálbmi sárdnu
viissisvuođa sániid,
mu jurdagat leat jierpmálaččat.
5 Mun guldalan viissisvuođa sániid,
mun čilgen árvádusaid
lyra čuojahemiin.
6 Manne mun galggašin ballat
bahás beivviin,
go behtolaččaid bahávuohta
birastahttá mu?
7 Sii dorvvastit opmodahkii
ja rámidit iežaset stuorra riggodaga.
8 Ii olmmoš sáhte lonistit vieljas,
ii son sáhte addit su ovddas
Ipmilii lonástusruđa.
9 Heakka lotnásat leat ilá divrasat,
dat báhcet agibeaivái mávssikeahttá.
10 Olmmoš ii sáhte eallit agálaččat
ja vealtat mannamis hávdái.
11 Son šaddá oaidnit ahte velá
viisátge jápmet
seammá láhkái go doavkkit
ja jierpmeheamit.
Sii guđđet opmodagaset earáide.
12 Hávdi šaddá sin ruoktun agálaččat,
sin orrunsadjin buolvvas bulvii,
vaikko sii eaiggádušše eatnamiid.
13 Buot hearvásvuođastis
olmmoš ii sáhte eallit agálaččat,
elliid láhkái songe duššá.
14 Nu geavvá jierpmehemiide
ja daidda geat jáhkket
sin sániide. Sela
15 Sii mannet vuolás
jábmiidáibmui dego sávzzat,
jápmin šaddá sin báimmanin.
Vuoigatlaččat ráđđejit sin
go iđedisguovssu badjána.
Sin hápmi billašuvvá
jábmiidáimmus.
16 Muhto Ipmil lonista mu,
son čoavdá mu
jábmiidáimmu fámus. Sela
17 Ale hirpmástuva
jos soamis riggu,
jos vallji lassána su dálus.
18 Go son jápmá,
de son ii oaččo mielde maidege,
riggodat ii čuovo su hávdái.
19 Son sáhttá máidnut iežas
lihkolažžan dán eallimis,
ja olbmot rámidit su
go son lea birgen bures.
20 Dattetge son manná
áhčiidis lusa,
geat eai goassege šat
oainne čuovgga.
21 Buot hearvásvuođastis
olmmoš lea jierpmeheapme,
elliid láhkái songe duššá.