Sálbma 55
1 Koarrajođiheaddjái. Streaŋgačuojanasaiguin. Davida oahpahansálbma.
2 Ipmil, guldal mu rohkosa,
ale čiehkát go mun ánun veahki.
3 Gula mu ja vástit munnje,
mu morrašat eai atte munnje ráfi.
Mun doarggistan
4 go vašálaš čuorvu
ja ipmilmeahttumat givssidit mu.
Sii fierahit vártnuhisvuođa
mu badjelii,
doarrádallet mu vašisteaset.
5 Mu váibmu doarggista rattis,
mun dohppehalan jápminballui.
6 Mun balan ja doarggistan,
suorganeapmi gokčá mu.
7 Vare mus duvvá soaját,
dalle mun girdilivččen ja gávnnašin
alccesan orrunsaji,
8 báhtarivččen guhkás
ja válddášin orrunsaji meahcis.
Sela
9 Hoahpus mun ozašin suoji
garra biekka ja ramádaga ovddas.
10 Moivašuhte sin, Hearrá,
moive sin giela.
Mun oainnán veahkaválddi
ja riidaleami gávpogis,
11 ija beaivvi sii vázzet
dan birra muvrraid alde.
Bahávuohta ja vearrivuohta
ásset gávpogis,
12 billašupmi dan guovdu,
veahkaváldi ja behtolašvuohta
eai goassege gáidda dan bálgáin.
13 Jos mu vašálaš hiddjidivččii mu,
de dan mun gierddašin.
Jos mu vašuheaddji
čeavlástalašii munnje,
de dalle mun sáhtášin čiehkádit.
14 Muhto don leat mu láhkásaš,
mu ustit ja mu oahpis.
15 Lagaš searvevuođas
moai vácciime ávvufárus
Ipmila vissui.
16 Vare sii jámášedje,
vare sii manašedje eallinaga
jábmiidáibmui!
Sin orrunsaji dievva
lea bahávuohta.
17 Muhto mun čuorvvun Ipmilii,
ja Hearrá beastá mu.
18 Eahkedis ja iđedis
ja gaskabeaivvi
mun luoimman ja šuohkán,
ja son gullá mu jiena.
19 Vaikko eatnagat fallehit mu,
de son lonista mu soađis
ja addá munnje ráfi.
20 Ipmil guhte čohkká
truvnnustis dološ áiggi rájes,
gullá mu,
muhto sin son vuolida. Sela
Mu vašálaččat eai nuppástuva,
sii eai bala Ipmilis.
21 Behtolaš olmmoš givssida ustibiiddis,
son rihkku lihtu.
22 Liktásat go vuodja
leat su ságat,
muhto su váimmu jurdda
lea soahti.
Su sánit leat litnásat dego olju,
muhto bastilat
dego rohttejuvvon miehkki.
23 Bija nođiidat Hearrá háldui,
son atná dus fuola.
Son ii goassege suova
vuoigatlaš olbmo suoibut.
24 Don, Ipmil, norddastat
sorbmejeddjiid ja behtolaččaid
hávdái,
sii eai juvssa bealige
beivviineaset.
Muhto mun dorvvastan dutnje.