Sálbma 58
1 Koarrajođiheaddjái. Lávlojuvvo dego “Ale bilit”. Davida miktam.
2 Fámolaččat, sárdnubehtetgo
dii duođaid riekta?
Dubmebehtetgo dii olbmuid
vuoigatlaččat?
3 Ehpet! Mielaeavttus
dii dahkabehtet veriid eatnama alde,
jalgebehtet geainnu veahkaváldái.
4 Ipmilmeahttumat leat čádjidan
riegádeami rájes,
gitta eatniset goaŧu rájes
gielástallit leat čádjádusas.
5 Sin mirko lea dego gearbmašmirko,
sii notket beljiid ja
leat dego bealjehis gearpmaš
6 mii ii gula
gearpmašlabmu jiena,
ii velá čeahpimus labmuge jiena.
7 Ipmil, cuvke bániid sin njálmmis,
Hearrá, molle ledjoniid bániid!
8 Divtte sin jávkat dego čáhci
mii golgá eret,
nugo rássi mii duolmmahallá
ja goldná.
9 Divtte sidjiide geavvat dego riipui
mii suddá njivlin njoamudettiin,
divtte sin šaddat cuovkanan
ogi láhkásažžan
mii ii goassege oaidnán beaivváža.
10 Dego riđđu son bossu sin eret,
ovdal go sii levvet
nugo bastilislánját.
11 Muhto vuoigatlaš illuda
go oaidná ahte son beassá mávssahit.
Son beassá bassat julggiidis
ipmilmeahttumiid varas.
12 Dalle olbmot dadjet:
“Vanhurskkis oažžu bálkkás.
Duođaid, lea Ipmil guhte dubme
eatnama alde.”