Sálbma 61
1 Koarrajođiheaddjái. Streaŋgačuojanasaiguin. Davida sálbma.
2 Gula mu váidalančuorvasa, Ipmil,
guldal mu rohkadusa!
3 Eatnama ravddas
mun čuorvvun du
go mu váibmu vuoimmehuvvá.
Doalvvo mu bávtti ala
ja atte munnje dorvvu.
4 Don leat leamaš
mu báhtaransadji,
nana toardna vašálačča vuostá.
5 Mun dáhtun ássat
du goađis álelassii
ja gávdnat suoji du soajáid vuolde.
Sela
6 Ipmil, don leat gullan
mu lohpádusaid,
don leat addán munnje árbbi
daiguin geat ballet du namas.
7 Don lasihat gonagassii
eallinjagiid,
son ráđđe buolvvas bulvii.
8 Vare su truvdnu bisošii agálaččat
du muođuid ovddas,
vare du árbmu ja oskkáldasvuohta
várjalivččii su!
9 Dalle mun lávllun máidnuma
du nammii agálaččat
ja ollašuhtán lohpádusaidan
beaivvis beaivái.