Sálbma 75
1 Koarrajođiheaddjái. Lávlojuvvo dego “Ale bilit”. Asafa sálbma. Lávlla.
2 Mii giitit du, Ipmil,
mii máidnut du
ja čuorvut du nama,
mii muitalit du oavdudaguid.
3 Mun, Hearrá, mearridan áiggi,
mun dubmen riekta.
4 Eanan ja buohkat geat ásset das,
doarggistit,
muhto mun nannen
dan vuođđobácciid. Sela
5 Mun cealkkán čeavlás olbmuide:
“Allet čeavllástala!”
ja ipmilmeahttumiidda:
“Allet alit iežadet,
6 allet sártno roavvásit
ja ceakkoniskkiid.”
7 Ii nuortan iige oarjin,
ii velá meahcisge
boađe oktage alidit sin.
8 Go Ipmil dubme,
de ovtta son vuolida, nuppigis alida.
9 Hearrá gieđas lea cearkki dievva
sorpon, máisttagahtton viidni.
Son leike viinni
buot eatnama ipmilmeahttumiidda,
ja sii fertejit juhkat dan,
gurret botni ráje.
10 Muhto mun máinnun Hearrá
agibeaivvi,
lávllun giitosa Jakoba Ipmilii.
11 Son cuvke ipmilmeahttumiid fámu,
muhto vuoigatlaš aliduvvo.