Sálbma 89
1 Esrahlaš Etana oahpahansálbma.
2 Mun lávllun ja máinnun álelassii
Hearrá oskkáldasvuođa.
Mun gulahan du oskkáldasvuođa
buolvvas bulvii:
3 Mun cealkkán: Du árbmu
bissu nanusin agálaš áigái,
du oskkáldasvuohta
bissu nanusin almmis.
4 “Mun, Hearrá, lean dahkan lihtu
suinna gean lean válljen,
mun lean vurdnon
bálvaleaddjásan Davidii:
5 Du soga mun bisuhan agálaš áigái,
du truvdnu bissu nanusin
buolvvas bulvii.” Sela
6 Hearrá, almmit rámidit du oavdduid,
basiid čoakkalmas du oskkáldasvuođa.
7 Gii allagasas livččii Hearrá veardásaš,
guhtemuš ipmiliid bártniin
Hearrá láhkásaš?
8 Stuoris ja hirpmus lea Ipmil
basiid čoakkalmasas,
suorggatlaš buohkaide geat leat su birra.
9 Hearrá, Almmiveagaid Ipmil,
gii lea gievra nugo don?
Hearrá, don leat fámolaš,
oskkáldasvuohta birastahttá du.
10 Don ráđđet meara goargatvuođa,
don jaskkodahtát báruid,
go dat badjánit.
11 Don cuvkejit Rahaba,
časket dan jámas,
biđgejit vašálaččaidat gievrras gieđainat.
12 Du lea albmi ja du lea eanan,
don leat vuođđudan máilmmi
ja buot mii das lea.
13 Don leat sivdnidan davi ja luli,
Tabor ja Hermon rámidit du nama.
14 Du giehta lea fámolaš,
du bajiduvvon olgeš giehta lea gievra.
15 Vanhurskkisvuohta ja vuoigatvuohta
leat du truvnnu vuođđudus,
árbmu ja oskkáldasvuohta
du bálvaleaddjit.
16 Ávdugas dat álbmot
mii máhttá máidnut du, Hearrá!
Dat álbmot beassá vádjolit
du muođuid čuovgasis.
17 Beaivvis beaivái sii illudit du namas
ja ávvudit du vanhurskkisvuođas.
18 Don leat sin hearvás givrodat,
du buorrevuođas mii oažžut fámu.
19 Hearrá lea min galba,
Israela Bassi min gonagas!
20 Oktii don sárdnot oainnáhusas
iežat oskkáldasaide:
“Mun lean čuoččáldahttán
nuorra olbmá álbmoga gaskkas,
lean bidjan kruvnnu sáŋgára oaivái.
21 Mun lean gávdnan Davida,
bálvaleaddján,
ja vuoidan su bassi oljjuin.
22 Mu fápmu nanne su,
mu giehta lea sus doarjjan.
23 Vašálaš ii su vuoitte,
veahkaválddálaš ii su soardde.
24 Su vuostálastiid mun cuvken su ovdii,
mun časkkán buohkaid
geat vašuhit su.
25 Mu oskkáldasvuohta
ja buorrevuohta lea suinna,
mu nammii su fápmu šaddá stuorisin.
26 Mun bijan meara su gieđa vuollái,
attán eanuid su olgeš gihtii.
27 Son dadjá munnje:
‘Don leat mu áhčči,
mu Ipmil ja mu bestojumi bákti’.
28 Son lea mu vuosttašriegádeaddji,
alimus eatnama gonagasain.
29 Mun lean sutnje oskkáldas
agálaš áigái,
mu lihttu suinna bissu nanusin.
30 Mun bisuhan su soga álelassii,
su truvnnu nu guhká go albmi lea.
31 Jos su bártnit hilgot mu lága
eaige doahttal mu báhkkomiid,
32 jos sii rihkkot mu lágaid
eaige doala mu gohččumiid,
33 dalle mun ráŋggáštan sin
rissiin sin rihkkumiid geažil,
huškkun sin sin vearredaguid dihte.
34 Muhto árpmu
mun in váldde sus eret,
in beahte iežan oskkáldasvuođa.
35 Mun in rihko lihtton
inge rievdat dan maid lean sárdnon.
36 Oktii mun vurdnon
bassivuohtan bokte: In beahte Davida.
37 Su sohka bissu agálaš áigái,
su truvdnu dego beaivváš mu ovddas,
38 dat bissu agálaččat dego mánnu,
dat oskkáldas duođašteaddji
allagasas.” Sela
39 Almmatge don nordadit eret
su gean leat vuoidan, hilgot su moaristat.
40 Don rihkkot lihtu
maid ledjet dahkan bálvaleddjiinat,
heahppášuhttet su kruvnnu
ja dulbmet dan muldii.
41 Don gaikot eatnamii buot su muvrraid,
dahket su ladniid čievračopman.
42 Dál buohkat geat mannet meattá,
rievidit su,
su ránnját atnet su bilkun.
43 Don addet su vašálaččaide fámu,
illudahttet buot su vuostálastiid.
44 Su bastilis miehki don jorgalit,
it dorjon su soađis.
45 Don loahpahit su hearvásvuođa,
njeidet eatnamii su truvnnu.
46 Don oanidit su nuorravuođa beivviid,
gokčet su heahpadiin. Sela
47 Hearrá, man guhká?
Čiehkádatgo don agibeaivái?
Man guhká du moarri buollá dego dolla?
48 Muitte man oanehaš lea mu eallin,
man nohkavažžan don leat
sivdnidan buot olbmuid!
49 Gii olbmuid eallá
iige oainne jápmima,
gii beastá iežas eallima
jábmiidáimmu válddis? Sela
50 Hearrá, gos lea du oskkáldasvuohta,
gos du lohpádusat
maid váliin vurdnot Davidii?
51 Hearrá, ale vajálduhte
mo du bálvaleaddji heahppášuhttojuvvo!
Mun šattan gierdat álbmogiid bilkku.
52 Hearrá, geahča mo
du vašálaččat hiddjidit!
Sii hiddjidit su gean don leat vuoidan,
sii bilkidit su vuorbbi.
53 Máidnojuvvon lehkos Hearrá
agálaš áigái!
Amen, amen.