Sálbma 91
1 Dat gii čohkká Alimusa suojis
ja idjada Buotveagalačča suoivanis,
dat dadjá:
2 “Hearrá lea mu báhtaransadji
ja ladni.
Mu Ipmil, dutnje mun dorvvastan.”
3 Son beastá du loddebivdi gielas
ja heavaheaddji rohttudávddas.
4 Son lebbe soajáidis du badjelii,
ja daid vuolde don leat dorvvus.
Su oskkáldasvuohta lea galba ja suodji.
5 It don dárbbaš ballat ija balddáhusain,
it njuolas mii girdá beaivet,
6 it rohttudávddas mii njoammu
seavdnjadin
itge suohtas mii duššada beaiveguovdil.
7 Vaikko duhát olbmo gahčašedje
du bálddas,
logi duháha du olgeš gieđa bealde,
de dat ii ole dutnje.
8 Don beasat oaidnit iežat čalmmiiguin,
mo ipmilmeahttumiidda mávssahuvvo.
9 Du dorvu lea Hearrá,
don leat dahkan Alimusa iežat suodjin.
10 Ii mihkkege baháid deaivit du,
ii makkárge lihkuhisvuohta boađe
du goađi lahka.
11 Son gohčču eŋgeliiddis várjalit du,
gos ihkinassii don jođát.
12 Sii guddet du gieđaideasetguin,
amat nordadit juolggi geađgái.
13 Don duolmmat ledjona
ja gearbmaša,
don duolmmastat eatnamii
nuorra ledjona ja guovddi.
14 “Son dorvvasta munnje,
ja mun gájun su,
mun attán sutnje suoji,
dasgo son dovdá mu nama.
15 Son čuorvu mu,
ja mun vástidan sutnje,
mun lean suinna go son lea heađis,
mun gájun su ja attán sutnje gudni.
16 Mun gallehan su guhkes eallimiin,
divttán su oaidnit iežan veahki.”