Sálbma 94
1 Hearrá, don leat Ipmil
gii mávssahat. Loaiddas ovdan
hearvásvuođas, mávssaheami Ipmil!
2 Čuožžil, eatnama duopmár,
mávssat čeavlás olbmuide!
3 Man guhká, Hearrá,
man guhká don divttát
ipmilmeahttumiid ávvudit?
4 Man guhká sii ožžot rámppastaddat,
golggahit njálmmis julges sániid?
5 Hearrá, sii cuvkejit du álbmoga,
sordet du opmodaga.
6 Leaskkaid ja vierrásiid sii goddet,
oarbásiid sii sorbmejit.
7 Sii dadjet: “Ii Hearrá oainne dan,
Jakoba Ipmil ii fuomáš.”
8 Smiehtastehket,
álbmoga jierpmeheamit!
Goas dii mielaheamit jierbmabehtet?
9 Son guhte dagai bealji,
iigo son gulaše?
Son guhte hábmii čalmmi,
iigo son oainnáše?
10 Son guhte bagada álbmogiid,
son guhte máhttáha olbmuid,
iigo son ráŋggáštivčče?
11 Hearrá dovdá olbmuid jurdagiid,
son diehtá ahte dat leat duššálaččat.
12 Ávdugas dat gean don, Hearrá,
bagadat,
dat geasa don oahpahat iežat lága.
13 Don attát sutnje ráfi bahás beivviid,
go hávdi juo roggojuvvo ipmilmeahttumii.
14 Hearrá ii hilggo álbmogis
iige guođe iežas opmodaga.
15 Vuoigatlaččat ožžot fas vuoigatvuođa,
ja buot rehálaččain lea boahtteáigi.
16 Gii bealušta mu bahás olbmuid vuostá,
gii veahkeha mu vearredahkkiid gieđas?
17 Jos Hearrá ii livčče mu veahkki,
de dalle mun fargga
veallášin jaskatvuođas.
18 Jos mun dajan: “Mu juolgi juorbu”,
de du oskkáldasvuohta, Hearrá,
doarju mu.
19 Go ráfehis jurdagat
lassánit mu siskkildasas,
de du jeđđehus illudahttá mu.
20 Don it doarjjo vearálaš duopmáriid,
daid geat dahket vearrivuođa
lága nammii.
21 Sii searvvadit vuoigatlačča vuostá
ja dubmejit vigiheami jápmimii.
22 Muhto Hearrá lea mu ladni,
Ipmil lea mu dorvobákti.
23 Son mávssaha sidjiide
sin vearrivuođa,
son časká sin sin bahávuođa geažil.
Hearrá, min Ipmil, duššada sin.