Sálbma 97
1 Hearrá lea gonagas!
Ávvudehkos eanan,
illudehkoset gáiddus rittut!
2 Balva ja seavdnjadas lea su birra,
vuoigatvuohta ja vanhurskkisvuohta
leat su truvnnu vuođđu.
3 Dolla manná su ovddas
ja loaktá buot su vašálaččaid.
4 Su álddagasat čuvgejit oppa máilmmi,
eanan oaidná dan ja doarggista.
5 Várit suddet dego gáhčči
Hearrá ovddas,
oppa eatnama Hearrá muođuid ovddas.
6 Albmi sárdnida su vanhurskkisvuođa,
buot álbmogat oidnet su hearvásvuođa.
7 Buohkat geat bálvalit govaid,
šaddet heahpadii,
buohkat geat rámádallet
duššálaš ipmiliiguin.
Buot ipmilat gopmirdit su.
8 Sion gullá dan ja ávvuda,
Juda gávpogat illudit,
danin go du duomut, Hearrá, leat vuoigadat.
9 Don, Hearrá,
leat Alimus oppa eatnamis,
aliduvvon badjel buot ipmiliid.
10 Dii geat ráhkistehpet Hearrá,
vašuhehket bahá!
Son várjala daid heakka geat ballet sus,
son beastá sin ipmilmeahttumiid gieđas.
11 Beaivi badjána vanhurskásiidda,
illu daidda geaid váibmu lea vuoigatlaš.
12 Illudehket Hearrás, vanhurskásat,
rámidehket su bassi nama!